დმიტრი მედვედევი ამერკელ სენატორ ლინდსი გრეჰემს "ავიაკატასტროფით" დაემუქრა
უკრაინის პრეზიდენტის ვოლოდიმირ ზელენსკის მიერ 26 მაისს გამოქვეყნებულ ვიდეოში რესპუბლიკელი სენატორი, რუსეთის ხელისუფლების ცნობილი კრიტიკოსი და უკრაინისთვის დახმარების გაზრდის მომხრე, უკრაინელ ლიდერებთან განიხილავს რუსეთთან ომს და იარაღის მიწოდების საკითხს. ზელენსკი მას ეუბნება, რომ ომი უკრაინისთვის მიმდინარეობს ლოზუნგით „თავისუფლად ცხოვრება ან სიკვდილი“. "ახლა ჩვენ ვცხოვრობთ თავისუფლად", - ამბობს ზელენსკი. ”რუსები კი კვდებიან”, - ამბობს გრეჰემი. ამის შემდეგ გადაღების კუთხე იცვლება, რის გამოც არაა გამორიცხული, რომ იყოს მონტაჟის ელემენტი. ამ დროს სენატორი ამბობს: „ასე კარგად არასდროს დაგვიხარჯავს ფული“. ამ ფრაზის შემდეგ ზელენსკი მადლობას უხდის ვაშინგტონს იარაღის მიწოდებისთვის.
მოსკოვში ამერიკელი სენატორის მიერ ინვესტიციის შესახებ ნათქვამი სიტყვები, რომლებიც ერთი დღის შემდეგ გამოქვეყნდა, ისე იქნა ინტერპრეტირებული, თითქოს გრეჰემმა რუსების მკვლელობას (და არა უკრაინის დახმარებას) უწოდა აშშ-ის საუკეთესო ინვესტიცია. კრემლის სპიკერმა დმიტრი პესკოვმა თქვა: „ძნელია წარმოიდგინო უფრო დიდი სირცხვილი ქვეყნისთვის, ვიდრე ასეთი სენატორების ყოლაა“, ხოლო რუსეთის საგარეო საქმეთა სამინისტროს სპიკერმა მარია ზახაროვამ შეერთებული შტატები ნაცისტური გერმანიის დაფინანსებაში დაადანაშაულა: „კოკა-კოლას ქარხანა კიოლნში, გერმანიის მთავრობის მიერ მის ნაციონალიზაციამდე რეგულარულად აწვდიდა გაზიან წყალს გერმანიას, მათ შორის გერმანელ ჯარისკაცებსაც. ცნობილი Fanta კი საერთოდაც ნაცისტებმა გამოიგონეს“.
რუსეთის უშიშროების საბჭოს თავმჯდომარის მოადგილე დიმიტრი მედვედევი სენატორის განცხადებას Telegram-ით გამოეხმაურა, სადაც დაწერა, რომ შეერთებულ შტატებში „არა მარტო უბრალო ადამიანებს კლავენ რეგულარულად, არამედ ბინძურ ფულს სენატორების მკვლელობაზეც ხარჯებიან“.
„გაიხსენონ, რა ბედი ეწია რობერტ კენედის, ჰუი ლონგს, კლემენტა კარლოს პინკნის, ჯონ მილტონ ელიოტს, უეინ ოუენსს და სხვა ამერიკელ პოლიტიკოსებს“, - წერს მედვედევი და ჩამოთვლის სხვადასხვა დროს მოკლული ამერიკელი სენატორების სახელებს.
ეს არ არის პირველი ფარული მუქარა, რომელითაც მედვედევმა გრეჰემს მიმართა. 2023 წლის მარტში მედვედევმა კომენტარი გააკეთა 14 მარტს შავ ზღვაზე ამერიკული დრონის (Reaper MQ-9) ჩამოვარდნის ინციდენტზე. მაშინ გრეჰემმა მოუწოდა აშშ-ის შეიარაღებულ ძალებს ჩამოაგდონ რუსული თვითმფრინავები, თუკი ისინი ამერიკულ ობიექტებს საფრთხეს შეუქმნიან. მედვედევმა ამერიკელი სენატორის ამ სიტყვებს შემდეგი კომენტარი გაუკეთა: „სხვათა შორის, ასეთი არსებები ხანდახან ავიაკატასტროფაში ხვდებიან ხოლმე“, - თავის ამ განცხადებას მედვედევმა ჯვრის გამოსახულებიანი ემოჯი დაურთო.
2022 წლის გაზაფხულზე ყურადღება მიიპყრო გრეჰემის განცხადებამ, რომლის მიხედვითაც, რუსეთის შეიარაღებული ძალების რიგებში უნდა გამოჩნდეს "პოლკოვნიკი შტაუფენბერგი", რაც შეიძლება განიმარტოს როგორც ვლადიმირ პუტინის ფიზიკური ლიკვიდაციის მოწოდება, ადოლფ ჰიტლერის წარუმატებელი მკვლელობის მცდელობის ანალოგიით. .
უკრაინის პრეზიდენტის აპარატის მრჩეველმა მიჰაილო პოდოლიაკმა 28 მაისს ტვიტერში დაწერა, რომ მისი აზრით, დღეს საუკეთესო ინვესტიცია ნამდვილად არის ინვესტიცია „უკრაინის სრულ და უპირობო გამარჯვებაში“.