Վթարի ենթարկված ըմբիշներից 2-ի վիճակը ծայրահեղ ծանր է, մյուսներինը՝ ծանր
Երեկ հայկական մարզաշխարհը ցնցեց պատանի ըմբիշների մասնակցությամբ ողբերգական ավտովթարը:
Ավելի ուշ պարզվեց, որ Արտաշատից Գառնի տանող ճանապարհի 14-րդ կիլոմետրի հատվածում, դեպի Գառնի գնացող ուղեմասում, միմյանց են բախվել Գառնի գյուղի 42 ամյա բնակչի կողմից վարած «Վոլկսվագեն Այդի 4» մակնիշի ավտոմեքենան և Վերին Արտաշատի բնակավայրի 38 ամյա բնակչի կողմից վարած «Վազ 2106» մակնիշի ավտոմեքենան։
Վթարի հետևանքով «Վազ 2106»-ի վարորդը տեղում մահացել է, իսկ նույն ավտոմեքենայի 6 ուղևորները, որոնց թվում 5-ը՝ երեխաներ, ինչպես նաև մյուս ավտոմեքենայի վարորդը, մարմնական տարբեր աստճանի վնասվածքներով տեղափոխվել են Երևան քաղաքի բժշկական հաստատություններ։
Ըստ նախնական տվյալների՝ «Վազ 2106» ավտոմեքենայով ըմբշամարտի 2 մարզիչները երեխաների հետ մեկնելիս են եղել Գառնի՝ ըմբշամարտի մրցումների մասնակցելու նպատակով։
Նախնական տվյալներով երեխաներից 2-ի վիճակը ծայրահեղ ծանր է, մյուսներինը՝ ծանր։
Դեպքի առթիվ ՀՀ Քննչական Կոմիտեի Կոտայքի մարզային քննչական վարչության Աբովյանի քննչական բաժնում նախաձեռնվել է քրեական վարույթ ՀՀ քրեական օրենսգրքի 342րդ հոդվածի 2-րդ մասի հատկանիշներով։
Նշանակվել են դատաբժշկական փորձաքննություններ։
Կատարվում են անհրաժեշտ վարութային և ապացուցողական գործողություններ՝ ավտովթարի պատճառները և այլ հանգամանքներ պարզելու նպատակով։
Նախնական տվյալներով ավտոմեքենաների վարորդների օրգանիզմում ալկոհոլի առկայություն չի հայտնաբերվել:
Ավելի վաղ հայտնել էինք, որ մայիսի 27-ին տեղի ունեցած ողբերգական վթարի հետևանքով պատանի ըմբիշները գտնվում են ծայրահեղ ծանր վիճակում և ունեն բոլորիս օգնության կարիքը:
Ըմբշամարտի ֆեդերացիայից տեղեկանում ենք, որ արյան դոնորի կարիք այս պահին չկա. արյուն հանձնողների թիվը մի քանի անգամ գերազանցել է կարիքը:
The post Վթարի ենթարկված ըմբիշներից 2-ի վիճակը ծայրահեղ ծանր է, մյուսներինը՝ ծանր appeared first on ԳԱԼԱ.