Бишкеклик талабалар собиқ президент Асқар Ақаев лекция ўқишига қарши чиқмоқда

Бишкекдаги Исҳоқ Раззақов номидаги Қирғиз техника университетининг айрим талабалари собиқ президент, академик Асқар Ақаев ўзларига лекция ўқишига қарши чиқмоқда. Улар 21 май куни университет ректорига талабаларнинг телеграм канали орқали бу борада мурожаат йўллашди.



Талабалардан бири Элхон Алибаев телеграм каналига «Ақаев ўзи қачонлардир келажагини ўғирлаб олган ёш авлод олдида лекция ўқишини мен ёшларни масҳаралаш сифатида қабул қиламан», деб ёзди.



Университет ректорати талабалар мурожаатига ҳозирча муносабат билдирмади.



Қирғизистонга 1991 йилда президент этиб сайланган академик Асқар Ақаев 2005 йил 24 мартидаги халқ қўзғолони ортидан мамлакатни тарк этган ва Москвадан бошпана топган эди. У хотини Майрам Ақаева билан бирга жорий йилнинг 20 май куни Қирғизистонга келган. Хабарларда у талабаларга лекция ўқиш учун келгани айтилган.



Бишкекка келишдан олдин, ўтган ҳафтада Ақаев Қозоғистон университетларида лекциялар ўқиган эди.



Ақаев 2005 йилдан бери илк маротаба 2021 йилнинг 2 августида «Қумтор иши» юзасидан ўтказилаётган терговга гувоҳ сифатида сўроқ бериш учун келган эди. У Бишкекда бир ҳафта турганидан сўнг яна Москвага қайтган.



Қирғизистон фуқаровий жамияти ҳукуматнинг бу ҳаракатини танқид қилган ва Асқар Ақаевни жиноий жавобгарликка тортишни талаб этган.



Бош прокуратура эса 1992 йилдаги «Қумтор» олтин кони лойиҳаси бўйича коррупция айблови билан Ақаевга қўзғатилган жиноят иши муддати ўтгани муносабати билан қисқартирилганини билдирган.