დე ფაქტო პარლამენტმა ამნისტიის შესახებ დადგენილება მიიღო - მამუკა ჩხიკვაძის საკითხი გაურკვეველია
დე ფაქტო პარლამენტის თავმჯდომარემ ალან ალბოროვმა საკითხზე მომუშავე ე.წ. დეპუტატებს დაავალა მკაფიოდ განსაზღვრონ ამნისტიის უფლებით მოსარგებლე პატიმართა კატეგორიები, რათა ამ საკითხმა დაბნეულობა არ გამოიწვიოს. დე ფაქტო პარლამენტის ვიცე-სპიკერმა პიოტრ გასიევმა კი ამნისტირებულთა სიის გამოქვეყნებაც მოითხოვა.
რადიო თავისუფლების ცხინვალელი წყაროს ცნობით, სიის დაზუსტება სწორედ ახლა მიმდინარეობს და როგორც კი ამ საკითხზე მუშაობა დასრულდება, ამნისტირებული პირები მაშინვე დატოვებენ საპყრობილეს. ამავე წყაროს ცნობით, ყოფილი სამხედრო მოსამსახურის მამუკა ჩხიკვაძის შესაძლო შეწყალების შესახებ ინფორმაცია პირველად აპრილში გავრცელდა - თითქოს დე ფაქტო პრეზიდენტი, ალან გაგლოევი მის შეწყალებას სააღდგომოდ აპირებდა, თუმცა პროცესი მაისისთვის გადაიდო და ჩხიკვაძეს ციხეშიც ურჩიეს, რომ ამნისტიის გამოცემას დალოდებოდა. ეს ინფორმაცია მამუკა ჩხიკვაძემ ბიძას, შმაგი ჭანკვეტაძეს თვითონაც დაუდასტურა. ბოლო ორი კვირის განმავლობაში მას მამუკა რამდენჯერმე დაუკავშირდა და გათავისუფლების მოლოდინის შესახებ აცნობა.
„დამიკავშირდნენ და მითხრეს, რომ ოსურმა მხარემ საიტზე დაიდო ინფორმაცია ამნისტიის გამოცხადების შესახებ და 50 კაცს შეეხებაო, მაგრამ სახელები და გვარები ჯერ არ არის ცნობილი. მამუკასთანაც მქონდა კონტაქტი და ისიც ელოდება გათავისუფლებას. 9 მაისისთვის ველოდებოდით, მაგრამ, ჩემი ინფორმაციით, ალბათ უფრო ზეგისთვის გაირკვევა", - ამბობს შმაგი ჭანკვეტაძე რადიო თავისუფლებასთან საუბარში.
27 აპრილს, ერგნეთში გამართულ ინციდენტების პრევენციის და მათზე რეაგირების მექანიზმის სამუშაო ჯგუფის შეხვედრაზე ოკუპირებული ცხინვალის ციხეში, უკანონო პატიმრობაში მყოფი მოქალაქეების გათავისუფლებაზეც იმსჯელეს. შეხვედრიდან გამოსულმა, სახელმწიფო უსაფრთხოების სამსახურის ანალიტიკური დეპარტამენტის უფროსის მოადგილემ ირაკლი ანთაძემ ჟურნალისტებთან განაცხადა, რომ ცხინვალიდან პოზიტიური სიგნალი მიიღო.
საოკუპაციო ძალების წარმომადგენლებმა მამუკა ჩხიკვაძე 2021 წლის 12 დეკემბერს დააკავეს სოფელ ზემო ნიქოზის სიახლოვეს. ყოფილი ჯარისკაცი მანამდე შინდისის გმირთა მემორიალთან ნახეს, მოგვიანებით კი ნიქოზის სასაფლაოსთან.
14 დეკემბერს მისმა მეგობრებმა გაავრცელეს ინფორმაცია, რომ ჩხიკვაძეს ცხინვალის იზოლატორში სცემდნენ და არაადამიანურად ეპყრობოდნენ. მათ სტრასბურგის ადამიანის უფლებათა სასამართლოს მიმართეს, სასამართლომ რუსეთის ფედერაციას, როგორც ოკუპირებულ ტერიტორიაზე ეფექტიანი კონტროლის განმახორციელებელ მხარეს, მამუკა ჩხიკვაძის მდგომარეობის შესახებ ინფორმაციის მიწოდება დაავალა.
მამუკა ჩხიკვაძეს 2022 წლის მაისში ოკუპირებული ცხინვალის სასამართლომ 5 წლითა და 6 თვით პატიმრობა მიუსაჯა. თუმცა, ჩხიკვაძის ცხინვალელმა ადვოკატმა ეს გაასაჩივრა. აგვისტოში კიდევ ერთი სასამართლო პროცესი ჩატარდა და ჩხიკვაძეს 3 წლით და 8 თვით პატიმრობა მიუსაჯეს.
ჩხიკვაძე წელიწად-ნახევარია უკვე ოკუპირებული ცხინვალის ციხეში იმყოფება, იქაური კანონმდებლობით პატიმრობის 2 დღე, 3 დღედ ითვლება, ამიტომ გამოდის, რომ ჩხიკვაძეს ე.წ. სასჯელის ნახევარი მოხდილი აქვს.
მამუკა ჩხიკვაძის გარდა, ცხინვალის ციხეში საქართველოს კიდევ 5 მოქალაქე იმყოფება. უმრავლესობა ე.წ. საზღვრის დარღვევის ბრალდებით არის გასამართლებული.