Վլադիմիր Պուտինը մայիսի 9-ի նախօրյակին շնորհավորական ուղերձ է հղել նաև Նիկոլ Փաշինյանին
Ռուսաստանի նախագահ Վլադիմիր Պուտինը մայիսի 9-ի նախօրյակին շնորհավորական ուղերձներ է հղել ԱՊՀ երկրների ղեկավարներին, այդ թվում՝ Հայաստանի վարչապետ Նիկոլ Փաշինյանին, ինչպես նաև Վրաստանի և Մոլդովայի ժողովուրդներին: «Արմենպրես»-ի փոխանցմամբ՝ այս մասին հաղորդում է Կրեմլի մամուլի ծառայությունը։
«Ռուսաստանի պետության ղեկավարը շնորհավորանքներում նշել է, որ այս նշանակալից օրը մենք խորին հարգանքի տուրք ենք մատուցում բոլոր նրանց, ում անօրինակ սխրանքները մարտի դաշտերում և անձնուրաց աշխատանքը թիկունքում թույլ տվեցին ջախջախել նացիստական զավթիչներին և պաշտպանել հայրենի եզերքի ազատությունը», – ասված է հաղորդագրության մեջ։
«Այսօր մեր բարոյական պարտքն է սրբորեն պահպանել մեր հայրերի և պապերի կողմից ժառանգված բարեկամության և փոխօգնության ավանդույթները, թույլ չտալ Հայրենական մեծ պատերազմի մասին պատմական ճշմարտության խեղաթյուրում», – գրել է Պուտինը շնորհավորանքներում։
Ինչպես ընդգծել է Ռուսաստանի նախագահը, Մեծ հաղթանակի հոգևոր ժառանգությունն այսուհետ էլ կնպաստի թվարկված երկրների և ժողովուրդների միջև հարաբերությունների ամրապնդմանը և բեղմնավոր զարգացմանը։
«Պուտինն անկեղծ երախտագիտության խոսքեր է փոխանցել Հայրենական մեծ պատերազմի բոլոր վետերաններին և թիկունքի աշխատավորներին, նրանց մաղթել քաջառողջություն, ոգու կայտառություն, երջանկություն և երկար տարիների կյանք», – եզրափակել են Կրեմլում:
The post Վլադիմիր Պուտինը մայիսի 9-ի նախօրյակին շնորհավորական ուղերձ է հղել նաև Նիկոլ Փաշինյանին appeared first on MediaLab Newsroom-Laboratory.