Бұрынғы қорғаныс министрі Мұрат Бектанов 12 жылға бас бостандығынан айырылды
Ақпаратқа қарағанда, Мұрат Бектановқа Қылмыстық кодекстің "билік өкілетін асыра пайдалану" бабы бойынша (451-бап, 3-бөлім) айып тағылған. Бұрынғы министр Қаңтар оқиғасынан кейін ұсталып, үстінен іс қозғалған. Үкім биыл 24 ақпанда Астана қаласының мамандандырылған ауданаралық әскери сотында оқылған. Оған қозғалған іс "құпияланған" істер санатына жатқызылған. Сот жабық өтті.
Бұған дейін Бектановтың қорғаушылары немесе туыстары ақпарат құралдарына шықпады.
Мұрат Бектанов ісі әскери сотқа берілгені былтыр қазанда белгілі болған. Әуелі Бектанов "қызметтік міндетін орындамау" бабы бойынша күдікке ілінгені айтылған. Кейін ол "билік өкілетін асыра пайдалану" бабы бойынша күдіктіге айналды. Тергеу органдарының болжамынша, Қаңтар оқиғасы кезінде елде төтенше жарияланған шақта Бектанов "заңсыз бұйрықтар беріп", "әскери стратегиялық нысандарды қорғаусыз қалдырған".
Қазақстанда 2022 жылы қаңтар басында сұйытылған газ күрт қымбаттап, елдің батысында наразылық басталған. Кейін ол өзге аймақтарға ұласып, кейбір қалаларда бүлік, тәртіпсіздіктер болды. Алматыда қарулы адамдар әкімдік пен президент резиденциясын басып алып, өртеді. Билік елде төтенше жағдай жариялап, "елге сырттан террористер шабуылдағанын" айтқан. Президент Қасым-Жомарт Тоқаев елде төтенше жағдай жариялап, ҰҚШҰ-дан әскери көмек сұрады.
Елде Қаңтардағы "тәртіпсіздіктерге қатысы бар" деген айыппен бірнеше лауазымды тұлға қамалған, арасында бұрынғы президент Нұрсұлтан Назарбаевтың айналасындағы лауазымды тұлғалардың бірі, ҰҚК-ның бұрынғы төрағасы Кәрім Мәсімов те бар. Ол Қаңтар оқиғасынан кейін ұсталды.
Халықаралық Human Rights Watch адам құқығын қорғау ұйымы Қаңтар оқиғасын билік біржақты тергеді, қаза болғандар мен азаптауға ұшырағандар ісі әділ қаралған жоқ деп мәлімдеген. Қазақстан билігі мұндай тұжырымды мойындамайды.