მდინარაძე: ამ გადაწყვეტილებას უკან ვერავინ წაიღებს. ათმაგი პროტესტი იქნება ამის უკან წაღებაზე
"აბსოლუტური სპეკულაციაა ფორმალურ დეტალებზე საკითხის გადატანა და ამით მუხტის შენარჩუნება, ეს არის პოლიტიკური გადაწყვეტილება, რომელსაც ყველა ხვდება, რომ უკან ვერავინ წაიღებს, თორემ ხალხი, ახლა თუ პროტესტზეა საუბარი, ათმაგი პროტესტი იქნება ამის უკან წაღების შემდეგ, ეს წარმოუდგენელი ამბავია.
ამ ლოგიკით შეგვიძლია ნებისმიერი გაწვეული კანონი ხელახლა დავაინიციროთ და მივიღოთ დაჩქარებული წესით. ეს არის წმინდა წყლის ფორმალური საკითხი.
ჩვენი პოლიტიკური ხასიათი ჩვენ მრავალჯერ გამოვავლინეთ. როდესაც ადამიანებს, ბავშვებს, შეცდომაშია შეყვანილი თუ გულწრფელი პროტესტი აქვს, აღარ აქვს მნიშვნელობა. როცა რაღაც რისკის ქვეშ დგება და ეს შეიძლება იყოს რომელიმე ბავშვის, რომელიმე ახალგაზრდის სიცოცხლე და ჯანმრთელობა, აქ ასეთი გადაწყვეტილებები უნდა მიიღო. ესაა ჩვენი ბუნება და ხასიათი" - თქვა მამუკა მდინარაძემ.
მდინარაძეს დღეს გამართულ ბრიფინგზე ჰკითხეს, თუკი პარტია უარს ამბობს სადავო კანონპროექტზე და მასთან მიბრუნებას აღარ აპირებს მომავალში, მაშინ რითია განპირობებული განცხადება იმის შესახებ, რომ ხალხთან ამ თემაზე ლაპარაკი უნდა გააგრძელონ და ყველას აუხსნან, რა იყო ამ კანონის არსი და მიზანი.
"ამის შესახებ უნდა ველაპარაკოთ ხალხს. ეს არ ნიშნავს იმას, რომ კანონპროექტი ან გაწვეული არ არის, ან უარს არ ვამბობთ მასზე. ერთი ადამიანის აღქმაშიც რომ დარჩეს, რომ ეს შეიძლება რუსულ საქმეს ემსახურებოდა, მას უნდა ავუხსნათ, სინამდვილეში რა ეწერა. რა აღმოვაჩინეთ იცით? - ამის გამპროტესტებელი ადამიანების თითქმის 100%-ს წაკითხული არ ჰქონდა" - თქვა მამუკა მდინარაძემ.
რადიო თავისუფლების კითხვაზე, ხომ არ აპირებს ხელისუფლება მიუბრუნდეს ამ საკითხს მას შემდეგ, რაც შეძლებენ საზოგადოების დარწმუნებას იმაში, რომ "აგენტების კანონი" მხოლოდ გამჭვირვალობას ემსახურება, მამუკა მდინარაძემ თქვა, რომ ამას დიდი პოლიტიკური რისკი ახლავს თან.
"პოლიტიკური განაცხადი, რასაც პასუხისმგებლობის დიდი ხარისხი ახლავს და საზოგადოება მსგავს საკითხებს ასე არ ატარებს. ვიცით ხომ, რამხელა პოლიტიკური რისკი ახლავს, შეიძლება ნებისმიერი ქვეყნის ხელისუფლება დამთავრდეს ასეთი საკითხების გადათქმის დროს" - თქვა მამუკა მდინარაძემ ამ კითხვის პასუხად.
დღეს დილით, 9 მარტს, „ქართული ოცნების“ საპარლამენტო უმრავლესობამ გაავრცელა განცხადება, რომელშიც ნათქვამია, რომ გაიწვევენ პირველი მოსმენით უკვე მიღებულ კანონპროექტს „უცხოური გავლენის გამჭვირვალობის შესახებ“, რომელმაც მასობრივი საპროტესტო გამოსვლები გამოიწვია.
მმართველი პარტიის თანახმად, "ემოციური ფონის ჩაცხრომასთან ერთად", საზოგადოებას უკეთ განუმარტავენ, "რას ემსახურებოდა კანონპროექტი და რატომ იყო მნიშვნელოვანი უცხოური გავლენის გამჭვირვალობის უზრუნველყოფა ჩვენს ქვეყანაში".
განცხადებაში წერია, რომ გადაწყვეტილება მიიღეს „კანონის გარშემო მიმდინარე პოლიტიკურ პროცესების“ გამო, „ქართული ოცნების“ პოლიტიკური საბჭოს, „ხალხის ძალისა“ და საპარლამენტო უმრავლესობის წევრებს შორის გამართული კონსულტაციის შედეგად.
საქართველოში, განსაკუთრებით თბილისში, მასობრივი საპროტესტო გამოსვლები მოჰყვა პარლამენტის მიერ "უცხოური გავლენის გამჭვირვალობის" კანონპროექტის პირველი მოსმენით მიღებას. კანონპროექტი უცხოეთის გავლენის აგენტად დარეგისტრირებას ავალდებულებს არასამთავრობო ორგანიზაციებს და მედიასაშუალებებს, რომელთა დაფინანსების დიდი ნაწილი (მინიმუმ 20%) უცხოეთიდანაა მიღებული.
პარლამენტმა კანონპროექტი პირველი მოსმენით 7 მარტს დაამტკიცა, საქართველოს საზოგადოების სხვადასხვა სფეროს წარმომადგენლების და ოპოზიციის პროტესტის და მოწოდებების მიუხედავად, უარი ეთქვა "რუსულ კანონზე" და ევროპული პერსპექტივის დასამარებაზე.
"ქართული ოცნების" საპარლამენტო უმრავლესობა პროვოკაციულს უწოდებდა განცხადებებს "რუსული კანონის" და ევროპული ინტეგრაციის მიზანმიმართული შეფერხების შესახებ და საკანონმდებლო ცვლილების ერთადერთ მიზნად ასახელებდა გამჭვირვალობას და საზოგადოების ინფორმირებას.
7 და 8 მარტს და 9 მარტს გამთენიისას, პოლიციამ საპროტესტო აქციები ძალის და სპეციალური საშუალებების გამოყენებით დაშალა. შსს-ს თანახმად, რომელიც აცხადებს, რომ აქციების მონაწილეები გავიდნენ მშვიდობიანი შეკრების ფარგლებიდან და ძალადობას მიმართეს, სულ დაკავებულია 133 პირი.
საქართველოს ხელისუფლებას კანონპროექტზე უარისკენ მოუწოდებდნენ აშშ, ევროკავშირი და მისი წევრი სახელმწიფოები და საერთაშორისო ორგანიზაციები.