რისთვის დააჯილდოვა ვოლოდიმირ ზელენსკიმ ლანა ღვინჯილია?
ოკუპაცია ის მთავარი მიზეზია, რის გამოც ლანა ღვინჯილია განსაკუთრებულად გულშემატკივრობს უკრაინელ ხალხს და ამ ქვეყნის მომავალს. ლანა სოხუმში დაიბადა. მას აფხაზეთში, ბებიის სახლში ბავშვობის არაერთი წელი აქვს გატარებული. დღემდე, ნამდვილი სახლის შეგრძნებაც იქაურობას უკავშირდება.
„აი, ეს ვერ დავთმე ვერასდროს. და ალბათ, ეს არის ყველაფრის მიზეზიც და მამოძრავებელი ღირებულებაც. საერთოდ ყველაფრის, რასაც უკვე 31 წელია ვაკეთებ“, - ამბობს ლანა ღვინჯილია.
თუმცა იმისთვის, რასაც ლანა თანამოაზრეებთან ერთად უკრაინისთვის აკეთებს, ჯილდოს ნამდვილად არ ელოდა - ომის დროს, დახმარების სურვილი ბუნებრივი მდგომარეობააო.
თებერვლის შემდეგ (და მანამდეც) ლანას უკრაინის საელჩოსთან, უკრაინულ არასამთავრობო ორგანიზაციებთან თითქმის უწყვეტი კავშირი აქვს.
როცა 2022 წლის 24 თებერვალს, რუსეთმა უკრაინაში ომი დაიწყო, ანტისაოკუპაციო მოძრაობის წევრების დიდმა ნაწილმა, უკრაინაში საომრად წასვლა გადაწყვიტა. ამ ოცამდე ადამიანს სხვა მსურველებიც შეუერთდნენ. ამ ამბავს ორგანიზება სჭირდებოდა. უამრავი დეტალი იყო გასათვალისწინებელი და მოსაგვარებელი - უსაფრთხოების გარანტიები, მგზავრობა, საბუთების მომზადება, კავშირების მოძებნა.
„მთელი მარტი გავათენე“, - იხსენებს ლანა ღვინჯილია, რომელიც ამ საორგანიზაციო საქმეებს აგვარებდა.
ამ საქმეების ნაწილი იყო უკრაინის თავდაცვასთან მოლაპარაკებაც და ისიც, თუ პოლონეთის საზღვარზე ქართველი მოხალისეები როდის რომელ ავტობუსზე უნდა დამსხდარიყვნენ, რომ დანიშნულების ადგილამდე მიეღწიათ.
იმ პერიოდში ლანა და მისი მეგობრები უკრაინელების დახმარებას სხვა გზებითაც ცდილობდნენ - მაგალითად, საჭირო რესურსების მომარაგებით. ეს იყო არა სამხედრო აღჭურვილობა, არამედ სხვადასხვა აუცილებელი ნივთი, რაც ველზე მეომრებს სჭირდებოდათ:
„ეს ნივთები, აპრილში, პირადად ჩავიტანე კიევში“.
მაგრამ ამ ომამდე იყო 2014 წელი. კიევის „მაიდნის“ ცნობილი მოვლენები და შემდეგ ომი უკრაინის აღმოსავლეთში. ლანა ღვინჯილია მაშინაც აქტიურობდა და თითქმის ყველა საპროტესტო აქციის თუ სხვა პროცესის ორგანიზებაში იყო ჩართული.
როცა 2014 წლის თებერვალში, მაიდანზე გასროლას პირველი მსხვერპლი მოჰყვა, მისი ორგანიზებით თბილისში აქცია გაიმართა, რომელიც CNN-ის ეთერშიც გავიდა.
„იმავე წლის აგვისტოში, როცა დონბასში რუსული ჯარი შევიდა, ისევ დავიწყე ფიქრი, რა გვექნა. როგორ გამოგვეხატა ჩვენი პროტესტი და სწორედ მაშინ გამიჩნდა პუტინის ფოტოს დაწვის იდეა აქციაზე. მახსოვს, პარლამენტთან ორასამდე ადამიანი მოვიდა. ეს ვიდეოც მოხვდა მაშინ CNN-ის საიტზე. 32 000 ნახვა ჰქონდა“...
ამ მოვლენების შემდეგ ლანა ანტიოკუპაციური მოძრაობის ოფიციალურად დაფუძნების იდეას შეუერთდა.
ლანა ფიქრობს, რომ, ალბათ, სწორედ მისი ეს საქმიანობა გახდა მიზეზი, რატომაც აღმოჩნდა იმ ადამიანების გვერდით, ვინც ვოლოდიმირ ზელენსკიმ უკრაინის მხარდაჭერისთვის დააჯილდოვა.
„ეს ამბავი რომ გავიგე, მხოლოდ მამიდაჩემს ვუთხარი. საჯაროდ არაფერი მითქვამს. მოგვიანებით სიაც გამოქვეყნდა და როცა ამ სიას ჩავხედე, მართლა შთაბეჭდილების ქვეშ ვიყავი, ისეთი ადამიანების გვერდით ამოვიკითხე ჩემი სახელი და გვარი. ცხადია, ეს სასიამოვნო ამბავია“, - უთხრა ლანა ღვინჯილიამ რადიო თავისუფლებას.
დაჯილდოების შესახებ ზელენსკის მიერ ხელმოწერილ ბრძანებულებაში წერია, რომ ეს ჯილდოები სიაში მოხვედრილ ადამიანებს გადაეცემათ:
• სახელმწიფოთაშორისი თანამშრომლობის განმტკიცებაში მნიშვნელოვანი პირადი დამსახურებისთვის;
• უკრაინის სახელმწიფო სუვერენიტეტისა და ტერიტორიული მთლიანობის მხარდაჭერისთვის;
• მსოფლიოში უკრაინის სახელმწიფოს პოპულარიზაციის საქმეში მნიშვნელოვანი წვლილისთვის.
ზელენსკიმ სხვადასხვა ჯილდოთი ასზე მეტი ადამიანი დააჯილდოვა.
მათ შორის, ევროკომისიის პრეზიდენტი ურზულა ფონ დერ ლაიენი, ამერიკის შეერთებული შტატების სახელმწიფო მდივანი ენტონი ბლინკენი, ლიეტუვის რესპუბლიკის საგარეო საქმეთა მინისტრი გაბრიელიუს ლანდსბერგისი, კომპანია Baykar Makina-ს გენერალური დირექტორი, ჰალუქ ბაირაქთარი, ევროპის კომისიის ვიცე-პრეზიდენტი ჟოზეპ ბორელი და სხვები.