ავღანეთის საფეხბურთო ნაკრების მოთამაშე დაიღუპა ქაბულიდან გაქცევის მცდელობისას
19 წლის ზაქი ანვარი დაიღუპა მას მერე, რაც შეეცადა ამძვრალიყო აშშ-ის სატრანსპორტო - C-17-ის ტიპის - თვითმფრინავზე, რომელიც ქაბულიდან ამერიკის და ავღანეთის მოქალაქეების ევაკუაციას ახორციელებდა 16 აგვისტოს. მისი სიკვდილი დაადასტურა ავღანეთის ფიზაღზრდისა და სპორტის გენერალურმა სამმართველომ.
გავრცელდა ურთიერთსაპირისპირო ცნობები ანვარის სიკვდილის გარშემო: ერთი ვერსიით ის გარდაიცვალა თვითმფრინავიდან ჩამოვარდნის შედეგად. მეორე ვერსიით, მისი სხეულის ნაწილები იპოვნეს ბორბლების მექანიზმში.
აშშ-ის სამხედრო-საჰაერო ძალები იძიებს მომხდარს, რა ვითარებაში მოხდა თვითმფრინავის აფრენა, როცა მასზე აძვრნენ და სტარტის შემდეგ გარედან ზედ ეკიდნენ თალიბანის მიერ ქაბულის დაკავების შემდეგ ქვეყნიდან გაქცევის მოსურნე ადამიანები. თვითმფრინავი, რომლის ბორტზე იმყოფებოდა 640 ავღანელი და ამერიკელი მოქალაქე, აფრინდა უსაფრთხოების მძიმე ვითარებაში, როცა ავღანელები, რომლებიც ქაბულის აეროპორტის ტერიტორიაზე შევიდნენ, ალყა შემოარტყეს თვითმფრინავს. ადამიანის სხეულის ნაწილებს მიაკვლიეს C-17-ის შასის მექანიზმში უკვე ყატარში დაფრენის შემდეგ.
აშშ-ის სამხედრო-საჰაერო ძალების განცხადებით, ქაბულის აეროპორტში უსაფრთხოების ზომების დაცვას ცდილობენ, რათა მსგავსი ტრაგედია არ განმეორდეს.
ავღანეთში თალიბანის მმართველობის დროს, 1996-2001 წლებში აიკრძალა ავღანეთის ტრადიციული სპორტის სახეობები მიზეზით, რომ ისინი „არაისლამურია“ და მკაცრი აკრძალვა შეეხო სხვათა შორის, ფეხბურთსაც.
სპორტში ქალების მონაწილეობა მკაცრად აიკრძალა და ავღანეთი არ დაუშვეს 2000 წლის ოლიმპიადაზე თალიბების მხრიდან ქალთა დისკრიმინაციის გამო.
ავღანეთის ქალთა საფეხბურთო გუნდის ყოფილი კაპიტანი და თანადამაარსებელი, ხალიდა ფოფალი, რომელმაც თალიბანის დამხობის შემდეგ, 2001 წელს ქალთა საფეხბურთო გუნდი დააფუძნა, გაფრთხილებით გამოდის, რომ ქალთა ფეხბურთელებმა მათი სათამაშო ფორმები უნდა დაწვან. ისინი დაშინებული არიან, შეშფოთებული არიან, არა მხოლოდ მოთამაშეები, აქტივისტები, მაგრამ "ვერავის მიმართავენ დაცვისა თუ დახმარებისთვის, როცა საფრთხე ემუქრებათ“, ამბობს ფოფალი, რომელმაც დანიას შეაფარა თავი მას მერე, რაც მუქარის სამიზნე გახდა.