ҚАЖД "саяси тұтқын" Елшібаевтың өзін жарақаттағанын растады
Жұма күні таратқан хабарламасында облыстық ҚАЖ департаменті Елшібаевтың өзін жарақаттағанын растаған.
"[Елшібаев] Биыл 28 маусымда Қылмыстық-атқару кодексі талаптарын бұзғаны үшін, яғни тыйым салынған заттарды сақтағаны, өндіргені және өткізгені үшін үш тәулікке тәртіптік изоляторға қамалған. 1 шілдеде ол өзінің сол қолының білек тұсына жарақат салып, мекеменің медицина қызметкерлері оны қарады, жағдайын "жақсы" деп бағалады" делінген хабарламада.
Департамент өкілдерінің айтуынша, Елшібаев сол күні кезекші прокурор қабылдауында болып, арыз-шағымы тыңдалған.
"Аталған дерек ақпараттарды есепке алу кітабына тіркелген, қазіргі таңда қызметтік тергеу жұмыстары жүргізіліп жатыр" дейді департамент өкілдері. Ресми орган хабарламада Елшібаевтың жаза өтеу мерзімі кезінде 6 рет жазалауға ұшырағанын атап өтіп, мінез-құлқын "теріс" деп бағалаған.
Облыстық ҚАЖД 9 шілдеде таңертең мекеме басшылығына сүйене отырып, Елшібаевтың жарақаттанғанын жоққа шығарған еді.
Құқық қорғаушылардың ақпаратына қарағанда, белсенділер бірнеше апта бұрын Елшібаевқа "Жас Алаш", "Дат", "Новая газета" басылымдарын жібере бастаған. Ал колония басшылығы оған аталған газеттердің "оппозициялық бағыттағы" басылымдар екенін алға тартып, беруден бас тартқан. Құқық қорғаушылар мен белсенділер қылмыстық-атқару жүйесі комитетіне шағым жазғаннан кейін заңнамаға сәйкес газеттер берілген.
– Бірақ енді олар қайтадан бермей қойған. Ержан оған наразы болған. Олар оның камерасын тінтіп, оған "қайрақты сүңгітіп жіберген" деп айтады. Ал қайрақ бұл ірі ережебұзушылық. Осылайша оны тәртіптік айыппұл изоляторына жіберген. Ол қарсылық ретінде қолын тіккен, - деген еді жұма күні таңертең құқық қорғаушы Бақытжан Төреғожина Азаттық тілшісіне.
Оның сөзіне қарағанда, заң бойынша тұтқындардың газет-басылымдарды алып отыруға құқығы бар.
Ержан Елшібаев – Жаңаөзендегі жұмыссыздық мәселесін көтерген белсенді. 2019 жылы қазан айында Жаңаөзен соты оны 5 жылға бас бостандығынан айырған.
Елшібаевтың өзі және құқық қорғаушылар, жақтастары істің саяси астары барын айтты. Елшібаевтың ісін сараптаған құқық қорғаушылар оны "саяси тұтқын" деп атаған.
Биыл маусым айында БҰҰ-ның жұмыс тобы Қазақстан билігі Ержан Елшібаевты түрмеге заңсыз қамады деген қорытынды жасап, оны дереу босатуға шақырған еді. Бірақ биліктен бұған реакция болмады.
Бұған дейін Елшібаев түрмеде өзіне қысым көрсетілгенін бірнеше рет мәлімдеген.
Қазір ол Қызылордадағы қатаң режимді ЗК-169/5 мекемесінде қамауда отыр.