ევროკავშირის მედიკამენტების უწყების გაფრთხილებით, შესაძლო კავშირია Pfizer-ისა და Moderna-ს ვაქცინებსა და გულის ანთებას შორის
მიოკარდიტი (გულის კუნთის ანთება) და პერიკარდიტი (გულის პერანგის ანთება) მითითებული უნდა იყოს, როგორც იმ ვაქცინების შესაძლო თანმდევი ეფექტი, რომლებიც რიბონუკლეინის მჟავას, როგორც მაცნის, პრინციპით მოქმედებს. ამის თაობაზე განცხადება გააკეთა ევროპის მედიკამენტების სააგენტოს (EMA) უსაფრთხოების კომიტეტმა 9 ივლისს. EMA-ს თანახმად, ამგვარი გართულება ემართებათ უპირატესად ახალგაზრდა კაცებს, რომლებსაც, როგორც წესი, გულზე გართულების სიმპტომები გამოაჩნდებათ ხოლმე მეორე დოზის გაკეთებიდან ორი კვირის განმავლობაში.
ეს მიკვლევა დასტურია გასულ თვეში გაკეთებული დასკვნისა, რომელიც გამოაცხადეს აშშ-ის ჯანდაცვის უწყების ოფიციალურმა პირებმა.
ევროპის მედიკამენტების უწყება ასევე გამოდის რეკომენდაციით, რომ პირები, რომლებსაც აქვთ „კაპილარების გაჟონვის სინდრომი“ (CLS), არ უნდა იქნენ აცრილი Johnson & Johnson-ის ერთდოზიანი ვაქცინით. „კაპილარების გაჟონვის სინდრომი“ (CLS) გასულ კვირაში შეიტანეს ანალოგიური მეთოდით მოქმედი AstraZeneca-ს და Vaxzevria-ს თანმდევი ეფექტების სიაში.
ევროპის მედიკამენტების უწყება ასევე აცხადებს, რომ ნაადრევია იმის დადგენა, საჭიროა თუ არა რიბონუკლეინის მჟავას (mRNA) პრინციპზე მოქმედი ვაქცინების ორ დოზაზე მეტი, როგორც ეს დღეს არის მიღებული. Pfizer-მა და მისმა გერმანელმა პარტნიორმა, BioNTech-მა, 8 ივნისს განაცხადეს, რომ აპირებენ მიმართონ აშშ-ის და ევროპის შესაბამის სამსახურებს, ნება დართონ აცრის დამატებითი დოზის გავრცელებაზე.
Pfizer-ს არგუმენტად მოჰყავს აცრიდან ექვსი თვის შემდეგ ინფიცირების გაზრდილი საშიშროება და კორონავირუსის უფრო სწრაფად გადამდები, "დელტა ვარიანტის" გავრცელება.