Ստրասբուրգում ռազմագերիների վերադարձի մասին զրուցել եմ ադրբեջանցի Սեիդովի հետ. նրանք պահանջում են ճանաչել Ադրբեջանի տարածքային ամբողջականությունը. Նաիրա Զոհրաբյան (տեսանյութ)
Ռազմագերիներին վերադարձնելու դիմաց Ադրբեջանը դնում է անընդունելի պահանջներ, որոնք ուղղակիորեն վերաբերում են Հայաստանի տարածքային ամբողջականությանը և որոնք հետագայում ուղղակիորեն փակելու են մեր պատմական Արցախի տարածքները վերադարձնելու լեգիտիմ հնարավորությունները: Այս մասին Աժ-ում լրագրողների հետ զրույցում ասաց Ազգային ժողովի պատգամավոր Նաիրա Զոհրաբյանը:
«Ադրբեջանը այս պահին դեռևս շարունակում է ունենալ կարծր դիրքորոշում, ես Ստրասբուրգում մոտ 40 րոպե զրուցել եմ ադրբեջանցի Սեիդովի հետ և ես կարծում եմ, որ ՀՀ իշխանությունների համար իրենց նախապայմանները պետք է լինեն բացարձակ անընդունելի: Իրենք բնականաբար խոսում էին անկլավների մասին, բայց որպես առաջնային քայլ նշում են, որ Հայաստանը պետք է ճանաչի Ադրբեջանի տարածքային ամբողջականությունը, պետք է տեղի ունենա դեմարկացիա, դելիմիտացիա»,-մանրամասնեց պատգամավորը:
Նաիրա Զոհրաբյանն անդրադրաձավ նաև Հայաստանում տեղի ունեցած արտահերթ ընտրությունների լեգիտմության վերաբերյալ ընդդիմադիրների ՍԴ-դիմելուն, նշելով, որ պետք է սպասել, տեսնել, թե ինչ ծանրակշիռ փաստեր են ներկայացվելու:
Ինչ վերաբերում է միջազգային կազմակերպությունների արձագանքին, նա նշեց. «Որևէ արձագանք չկա, ինձ համար ի սկզբանե կանխատեսելի էր, որ միջազգային, հատկապես՝ արևմտյան կառույցները ատամներով շարունակելու են պաշտպանել Նիկոլ Փաշինյանին: Նրանք գտնում եմ՝ Հայաստանում տեղի են ունեցել բացառապես ժողովրդավարական ընտրություններ: Տեսնենք՝ՍԴ դիմելուց հետո ինչ արձագանք կլինի»,-ասաց նա:
Խոսելով ԱԽ քարտուղար Արմեն Գրիգորյանի վերջին հայտարարության մասին առ այն, որ լինելու է կադրային ջարդ, Զոհրաբյանը նշեց․ «Դա անբարո հայտարարություն է։ Ամեն ինչ կախված է նրանից, թե ինչ ընդդիմություն կունենաք։ Եթե ընդդիմության նպատակը այսրոպեական իր փոքր շահի սպասարկումը չէ, այլ երկրի առջև ծառացած խնդիրների լուծումը, ապա կարող ենք համատեղ ձևավորել միասնական օրակարգ, որի հիմքում կլինեն անվտանգային հարցերը»։
Զոհրաբյանն ասաց, որ իր համար անակնկալ էր, որ ԲՀԿ-ն ընտրություներում չկարողացավ հաղթահարել 5 տոկոսի շեմը և նշեց, որ ԲՀԿ-ն բավարար ժամանակ կունենա հասկանալու իր օբյեկտիվ սխալները և բացթողումները։
Ինչ վերաբերում է խորհրդարանական ընդդիմության գործունեությանը, Զոհրաբյանը նշեց․
«Այո պետք գրավել ԱԺ-ի ամբիոնը, պետք է կազմալուծել և թույլ չտալ, որ պատերազմից և Արցախի հանձնումից հետո այս ամբիոնում քննարկեն օրինակ ավտոմոբիլային տրանսպորտի օրենքի նախագիծ»։
Այն քննարկումները, որ ԲՀԿ-ն գործարքի մեջ է մտել ներկա իշխանությունների հետ, Զոհրաբյանը շեշտեց, որ ինքը չունի փաստ դա պնդելու համար։
«Ես գտնում եմ, որ պատերազմից հետո այս դահլիճը պիտի կազմալուծվեր, և պետք է թույլ չտային, որ պատերազմը տանուլ տված մարդիկ մոտենան ամբիոնին, անկախ նրանից, թե մեզ անվտանգությունը դուրս կհրավիրեր դահլիճից, թե կզրկեին ձայնի իրավունքից, խորհրդարանական ընդդիմությունը պատերազմից հետո պետք է շատ ավելի կարծր դիրքորոշում որդեգրեր»,- ասաց նա։
Մանրամասները՝ տեսանյութում: