Нурлат районында халкыбызның күркәм бәйрәме Сабан туе булды
(Казан, 16 июнь, «Татар-информ»). 2021 ел Татарстанда Туган телләр һәм халыклар бердәмлеге елы булу быел Нурлатта узган Сабантуйда аеруча сизелде. Бу турыда Бөтендөнья татар конгрессы матбугат хезмәте хәбәр итә.
Бәйрәмгә кайткан кунакларны үзәк мәйдан капкасы янында Нурлат районы башлыгы Алмаз Әхмәтшин үзе каршы алды. Сабантуйга Экология һәм табигый ресурслар министры Александр Шадриков, Дәүләт советы депутатлары Людмила Рыбакова, Шамил Ягудин, Нурлат якташлыгы, Нурлат районында туган күп санлы предприятиеләр җитәкчеләре чакырулы иде.
Сабантуй мәйданына илтүче Дуслык урамы декоратив-гамәли сәнгать әсәрләре күргәзмәсе белән сокландырды.
Быел татар театр сәнгатенә нигез салган Габдулла Кариевның 135 еллыгына багышланган театраль тамаша бик күпләрнең күңелендә соклану уятты. Күлбай-Мораса музее, Нурлат татар театры, Бикүле халык театры, Кәкре Атау, Әлмәт авыллары мәдәният хезмәткәрләре әзерләгән «Сәяр-юлдаш» дигән тамаша күренекле артистның тормыш юлына сәяхәт кебек кабул ителде.
Габдулла Тукай музей йорты да зәвык белән эшләнгән иде.Татар халкының чәй өстәле күргәзмәсе, мастер -класслар якташларның тырыш, уңган булуын күрсәтеп тора. Хезмәт алдынгыларын бүләкләү тантанасы нурлатлыларның эшли дә, ял да итә белүен тагын бер кат раслады.
Нурлат Сабан туенда һәркем үзе яраткан милли уеннарда катнашып, якташлары Рөстәм Насыйбуллин, Фирдүс Тямаевның җырларын, Сабантуйны алып баручы Гөлназ Сәфәрова һәм Газинур Фәйзуллинның чыгышларын тыңлап ял итте.
Татар халкының бу күркәм бәйрәме туганнарның, дусларның матур очрашу урыны да Туган нигезне, туган якларны оныттырмау өчен иң милли бәйрәмнәрнең берсе ул Сабантуй.