მოსაზრებები და ღირებულებები საქართველოში - „კავკასიის ბარომეტრის“ ახალი კვლევა
მოსახლეობის დიდი ნაწილი მიიჩნევს, რომ პანდემიამ მისი ცხოვრება საკმაოდ (41%) ან ძალიან (28%) შეცვალა. გამოკითხულთა ნახევარზე მეტი 55% ფიქრობს, რომ ქვეყანა წარმატებით უმკლავდება პროცესს. 56% ემხრობა შეზღუდვების დაწესებას, ხოლო 34% ფიქრობს, რომ შეზღუდვები უნდა მოიხსნას.
CRRC 2008 წლიდან ატარებს კავკასიის ბარომეტრის კვლევას, რაც მას საშუალებას აძლევს გარკვეულ საკითხებზე მოსახლეობის აზრის ცვლილებას დააკვირდეს. . საზოგადოებრივი აზრის ბოლო კვლევაში 23%-მა თქვა, რომ უმუშევარია. ეს მაჩვენებელი 2015 წელს 27% იყო. ბოლო გამოკითხვისას 43%-მა თქვა, რომ დასაქმებული ან თვითდასაქმებულია, რაც ასევე თანხვედრაშია წინა წლების მაჩვენებელთან.
რესპონდენტების 29%-მა თქვა, რომ მათი ოჯახის წევრმა გასული 12 თვის განმავლობაში სამსახური დაკარგა. 66%-ის თქმით კი მისი ოჯახი გასულ წელთან შედარებით ნაკლებს გამოიმუშავებს.
კვლევის თანახმად 36% მიიჩნევს, რომ ქვეყანა არასწორი მიმართულებით ვითარდება, 31% კი ფიქრობს, რომ განვითარების პროცესი სწორად მიდის. მოსახლეობის ნახევარზე მეტი (58%) ფიქრობს, რომ დემოკრატია ყველა წყობაზე უკეთესია. ეს 2013 წლის შემდეგ დემოკრატიის მხარდაჭერის ყველაზე მაღალი მაჩვენებელია.
წინა წლების მსგავსად, მოსახლეობის აზრით, მთავარ პრობლემას უმუშევრობა (33%) წარმოადგენს, რომელსაც კორონავირუსი მოსდევს. მაღალია ეკონომიკური ხასიათის სხვა პრობლემების წილი: სიღარიბე (17%) და ფასების ზრდა (10%).
მოსახლეობა ყველაზე მეტად რელიგიურ ინსტიტუტებს (83%) და ჯარს (81%) ენდობა, ყველაზე ნაკლებად - პოლიტიკურ პარტიებსა და არასამთავრობო ორგანიზაციებს.
რაც შეეხება მთავრობის მიმართ მოსახლეობის დამოკიდებულებას, 50% ფიქრობს, რომ მთავრობამ ისე უნდა იზრუნოს ხალხზე, როგორც მშობელი ზრუნავს შვილებზე. 41% კი ამბობს, რომ მთავრობა ხალხის მიერაა დაქირავებული. ადამიანები ისე უნდა იქცეოდნენ როგორც ზრდასრულები და უნდა აკონტროლებდნენ მთავრობას.
რესპონდენტთა აზრი გაიყო 2020 წლის არჩევნების შეფასებასთან დაკავშირებით. 24%-ის აზრით შედეგები სრულად სამართლიანი იყო, ასევე 24% ფიქრობს, რომ სრულად უსამართლო იყო, ხოლო 33% ნაწილობრივ სამართლიანად მიიჩნევს შედეგებს.
მოსახლეობის აბსოლუტური უმრავლესობა მხარს უჭერს საქართველოს ევროკავშირსა და ნატოში გაწევრიანებას. ეს მაჩვენებელი ბოლო წლებში ყველაზე მაღალ ნიშნულზეა.
კავკასიის ბარომეტრი დაინტერესდა საქართველოს მოსახლეობის დამოკიდებულებითაც მთიანი ყარაბაღის კონფლიქტთან დაკავშირებით. გამოკითხულთა 70%-ს სმენია კონფლიქტის შესახებ. 55% მიიჩნევს, რომ ომის თავიდან არიდება შესაძლებელი იყო. 32% დადებითად აფასებს აზერბაიჯანის როლს კონფლიქტში, ხოლო სომხეთის ხელისუფლების როლს დადებით შეფასებას აძლევს 10%. თუმცა ამ კითხვაზე პასუხების გაცემა ყველაზე მეტ გამოკითხულს გაუჭირდა.
CRRC-მ კვლევის საველე სამუშაოები გასული წლის 8-14 დეკემბერს ჩაატარა. სატელეფონო ინტერვიუების მეშვეობით გამოიკითხა ე.წ. შემთხვევითი ნომრების გენერირების პრინციპით ამორჩეული 1 504 რესპონდენტი. შეფასებათა საშუალო ცდომილება - 2.2-2.8%-ის ფარგლებში მერყეობს. წელს „კავკასიის ბარომეტრის” მეათე გამოკითხვის მონაცემები გამოქვეყნდა.