რუსეთში პირებს შეუფარდეს "უცხოეთის აგენტის" სტატუსი
28 დეკემბერს საერთო ანგარიშით ხუთი ჟურნალისტი ან აქტივისტი დაემატა რუსეთის იუსტიციის სამინისტროს მონაცემთა ბაზას, სახელად "უცხოეთის მასმედია, რომელიც უცხოეთის აგენტის ფუნქციებს ასრულებს", რის შედეგადაც ეს პირები დაექვემდებარენ შეზღუდვებს - ვალდებულებას რეგულარულად განაცხადონ თავიანთი სამუშაოს ფინანსურ მხარეზე.
ამ კანონმდებლობას აკრიტიკებენ უფლებადამცველები, რომლებიც აცხადებენ, რომ კანონმა ზიანი მიაყენა არასამთავრობო ორგანიზაციებს და მას იყენებენ კრიტიკული ხმების შეზღუდვის მიზნით.
სიაში შეყვანილი ლიუდმილა სავიტსკაია და სერგეი მარკელოვი თანამშრომლობენ რადიო თავისუფლების რუსული სამსახურის ჩრდილოეთის განყოფილებასთან Sever.Realii. დენის კამალიაგინი მთავარი რედაქტორია საინტერნეტო საინფორმაციო გვერდისა Pskov Province და ისიც თანამშრომლობს რადიო თავისუფლების რუსულ სამსახურთან. სიაში ასევე მოხვდნენ ცნობილი უფლებადამცველი აქტივისტი ლევ პონომარიოვი და აქტივისტი და ორგანიზაცია წითელი ჯვრის თანამშრომელი, დარია აპაკხონჩიჩი.
რადიო თავისუფლების ვიცე-პრეზიდენტმა და მთავარმა რედაქტორმა, დეიზი სინდელარმა საპასუხო განცხადება გაავრცელა - "აღმაშფოთებელია, რომ პროფესიონალი ჟურნალისტები იმ პირველ პირებს შორის მოხვდნენ, რომლებიც რუსეთმა 'უცხოეთის აგენტებად' გამოყო. Sever.Realii-ზე ჩვენი კოლეგები პასუხისმგებლობით აშუქებდნენ ყველაფერს, სიტყვის თავისუფლების უფლებებიდან ადგილობრივი მთავრობის კორუფციამდე და კორონავირუსის მსხვერპლთა მზარდ რიცხვამდე. დღევანდელი ნაბიჯით იუსტიციის სამინისტრო ცალსახად აცხადებს, რომ ფაქტების გაშუქება დანაშაულია, და რომ მას ვერაფერი შეაჩერებს იმ ხმათა გასაჩუმებლად, რომლებიც ცდილობენ თავიანთი თანამოქალაქეების, რუსეთის ხალხის ინფორმირებას, დაცვას და ჩართვას".