د افغان نجلۍ 'شربت ګلې' عکس یوه بولۍ کې په ډېره لوړه بیه وپلورل شو
د بولۍ جوړولو پولنډۍ کمپنۍ دیسا یونیکوم جمعه راپور ورکړی چې د سټیف مک کري په لاس اخیستل شوی د شربت ګلې عکس په ۲۸۳۰۰۰ زلوتي پولنډیو چې له اویا زرو ډالرو ډېرې کېږي وپلورل شو.
بولۍ پنجشنبه ترسره شوې وه.
دیسا یونیکوم کمپنۍ ویلی د شربت ګلې عکس په ټول پولنډ کې په لوړه بیه د پلورل کېدو ریکارډ جوړ کړ.
د شربت ګلې عکس په ۱۹۸۵ کال د پېښور د کډوالو په یوه کمپ کې امریکايي عکاس سټیف مک کري واخیست او د نېشنل جیوګرافیک مجلۍ په پښتۍ خپور شو.
شربت ګله په عکس کې د خپل ژور ليد او شنو سترګو له کبله د کډوالو په نړيوال سمبول بدله شوه.
دا افغان مېرمنه چې اوس یې عمر نږدې پنځوسو کلونو ته رسېږي په کابل کې اوسي او افغان دولت کور ورکړی.