Ermeni Bazarda «Cemilevniñ davası» boyunca ilk diñlevler oldı
Rusiye kontrolindeki Ermeni Bazar şeer mahkemesinde iyülniñ 9-nda qırımtatar halqınıñ lideri Mustafa Cemilevniñ davası boyunca ilk mahkeme oturışuvı keçirildi.
Advokat Nikolay Polozovnıñ Qırım.Aqiqatqa bildirgenine köre, oturışuv vaqtında o, altı muracaat berdi. Qadı Venera İsroilova ise tek bir danesini qanaatlendirdi.
«Bugün imaye tarafı altı muracaat berdi: ukrain tilinde olğan dava malümatlarınıñ çıqarıluvı; Qırım işğalinden evel toplanğan dava malümatınıñ çıqarıluvı; silânı saqlav ve diqqatsız qullanuv davası boyunca cinayet aleti, delillerini talap etip aluv muracaatı; kelişmegen delil, hususan Rusiye Federatsiyasınıñ sıñırları qayd etilgen Qırım haritasınıñ çıqarıluvı; Mustafa Cemilevniñ Qırımğa kiriş yasağını köstergen FSB vesiqasını talap etip aluv aqqında muracaat; dava toqtatıluvı muracaatı. Bulardan tek bir danesi mahkeme tarafından qanaatlendirildi, o da qısmen. Müvekkilimniñ Qırımğa ve Rusiye Federatsiyasına kiriş yasağını isbatlağan vesiqa», – dedi Polozov.
Nevbetteki mahkeme oturışuvı iyülniñ 23-ne belgilendi.
Qırımdaki Rusiye Tahqiqat komitetiniñ idaresi aprelniñ 13-nde qırımtatar halqınıñ lideri Mustafa Cemilevni Rusiye Ceza kodeksiniñ üç maddesine köre qabaatladı. Advokat Nikolay Polozovnıñ aytqanına köre, şimdi Cemilevge qarşı oğlu Hayserniñ ukrain davası qullanıla.
Qırımda mayısnıñ 27-nde Rusiye Tahqiqat komiteti qırımtatar halqınıñ lideri Mustafa Cemilevge qarşı «cinaiy dava» tahqiqatını yekünledi.
İyünniñ 8-nde berilgen malümatqa köre, Rusiye Tahqiqat komiteti Cemilevniñ davasını mahkemege berdi. Bundan soñ Cemilevniñ advokatı Nikolay Polozov ne oña, ne de müvekkiline haber etilmedi, dep bildirdi.
Cemilevniñ fikirince, işğal etilgen Qırımda Rusiye FSBsi tarafından oña qarşı açılğan dava qırımtatarlarnı yarımadadan çıqarmaq içün qullanıla.
Ukraina prezidentiniñ Qırım Muhtar Cumhuriyetindeki temsilciligi Rusiye tahqiqatçılarınıñ qırımtatarlarnıñ milliy lideri Mustafa Cemilevge qarşı cinaiy davasını siyasiy taqip dep saya.