Ҳукумат боғ ва иссиқхоналарни лизинг ва кредит асосида аҳолига беришга қарор қилди
Ҳукумат қарорига мувофиқ, мазкур иш Боғдорчилик ва иссиқхона хўжалигини ривожлантириш агентлиги, Узумчилик ва виночиликни ривожлантириш агентлиги ҳамда Фермер, деҳқон хўжаликлари ва томорқа ер эгаларини қўллаб-қувватлаш жамғармаси томонидан амалга оширилади.
Интенсив боғ ва токзорлар барпо этиш, иссиқхоналар қуриш ишлари агентликлар ва Жамғарма томонидан, шунингдек, агентликлар билан келишилган ҳолда бошқа ташкилотлар томонидан амалга оширилади.
Қарор билан Интенсив боғ ва токзорлар барпо этиш, иссиқхоналар қуриш ҳамда уларни аҳолига лизинг ва кредит шартлари асосида бериш тартиби тўғрисидаги низом тасдиқланган.
Низомга кўра, ташаббускорлар мурожаати асосида туман ҳокимлиги, фуқароларнинг ўзини ўзи бошқариш органлари томонидан талабгорларнинг дастлабки рўйхати шакллантирилади.
Рўйхат шакллангач, туман ҳокимлиги тегишли агентликларга ёки жамғармага ёзма мурожаат қилади. Агентликлар, жамғарма икки ой муддатда интенсив боғ, токзор ёки иссиқхонани ташаббускорга лизинг ёки кредит шартлари асосида бериш учун лизинг ташкилотини ёки тижорат банкини аниқлайди. Лойиҳани тасдиқлаб, туман ҳокимлигига тақдим этади.
Шу асосда туман ҳокимлиги томонидан 10 кун муддатда интенсив боғ, токзор барпо этиш учун 10 гектардан, иссиқхона қуриш учун 3 гектардан кам бўлмаган ер майдони 10 йил муддатга вақтинча фойдаланиш шарти билан ажратилади.