Ukraina Tış işler nazirligi Tokayevniñ Qırım laflarını Qazahistan elçisinen muzakere etti
Ukraina Tış işler nazirliginiñ matbuat hızmeti bildirgenine köre, körüşüvde «halqara teşkilâtlardaki eki taraflı munasebetler ve işbirliginiñ aktual vaziyeti ve keleceginen bağlı fikirler bildirildi».
«Ukraina tarafı Almaniyanıñ Deutsche Welle devlet teleradiokompaniyasınıñ rus tilli saytında aydınlatılğan Qazahistannıñ Rusiyeniñ Ukrainağa ait Qırımnı qanunsız ilhaq etmege ıntıluvınıñ qabul etilmesinen bağlı endişesi bildirildi», – dep aytıla haberde.
Ukraina Tış işler nazirliginiñ bildirgenine köre, körüşüv neticesinde eki taraf da «1994 senesi yanvarniñ 20-nde tizilgen eki taraflı munasebetler ve işbirliginiñ temeli olğan Ukraina ve Qazahistan Cumhuriyetiniñ dostluq ve işbirligi aqlaşmasında qayd etilgen mustaqillik, devlet suvereniteti, topraq bütünligi ve sıñırlarnıñ deñişmeycegine qoltutqanını tasdıqladı».
Qazahistan prezidenti Kasım-Jomart Tokayev Deutsche Welle içün intervyü berip, 2014 senesi, Rusiye Ukrainağa ait yarımadanıñ öz toprağına «qoşulğanını» ilân etkende olğan adise-vaqialarnı ilhaq dep adlandırmay.
Dekabrniñ 4-nde Ukraina Tış işler nazirligi Qazahistanğa prezidenti Rusiyeniñ qanunsız Qırım ilhaqını inkâr etken içün demarş azırlağanını bildirdi.
Dekabrniñ 5-nde Qazahistanda Ukraina elçisi memleketniñ Tış işler nazirliginen körüşip, Kyivniñ Tokayevniñ Qırım laflarınen bağlı cevabını muzakere etmeli.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.