Երևանի արվարձաններից մեկում կմեկնարկի «հայկական Fryshuset-ի» շինարարությունը
Ազգային ժողովի պատգամավոր Մխիթար Հայրապետյանը, ով այս օրերին
աշխատանքային այցով գտնվում է Շվեդիայի Թագավորությունում, ուրախալի լուր է
ներկայացրել իր ֆեյսբուքյան էջում։ Հայտարարության մեջ, մասնավորապես,
ասվում է․
«Ոգեշնչել երիտասարդներին, օգնել նրանց` փոխել սեփական կյանքը, կատարելագործվել ու նոր հմտություններ ձեռք բերել. Շվեդիայում հավատացած են, որ կարող են աշխարհն ավելի լավը դարձնել հենց երիտասարդների միջոցով Սոցիալական ներգրավվածություն ու զարգացման հավասար հնարավորություններ՝ հասարակությունից մեկուսացված պատանիների համար. սա է այն հիմնական գաղափարը, որ Fryshuset բոլոր կենտրոններում կարմիր թելի նման անցնում է:
Շվեդերենից թարգմանաբար Fryshuset նշանակում է սառը պահեստ. 1984-ին այն հիմնվեց հենց սառը պահեստի մի տարածքում` հեռու կենտրոնից ու բարեկեցիկ պայմաններից: Այսօր արդեն Շվեդիայի տարբեր անկյուններում գործող այս հրաշալի կառույցներն ամենաաշխույժ երիտասարդական կենտրոններն են դարձել` հազարավոր երիտասարդների համար ստեղծելով բարձր կենսամակարդակ ունենալու լայն հնարավորություններ: Գերագույն հաճույք ստացանք` տեսնելով, թե ինչպես են, օրինակ, նախկինում այս կամ այն հանցավոր խմբավորումներում ներգրավված պատանիները, կտրվելով փողոցային կյանքից ու դրա բոլոր արատավոր դրսևորումներից, քաղաքի ամենավտանգավոր այս թաղամասում իրենց ժամանակն անցկացնում Fryshuset-ի մարզասրահներում ու պարահրապարակներում, ընթերցասրահներում ու լսարաններում:
Վիճակագրական տվյալներն առավել քան խոսուն են, փրկված ճակատագրերը՝ անթիվ:
Հ.Գ. Թեև արդեն մի քանի ամիս է Սփյուռքից ժամանած մեր հայրենակիցների հետ քննարկում էինք նման մի կենտրոն Հայաստանում հիմնելու գաղափարը, բայց չէի շտապում ձեզ պատմել այդ մասին: Կարծում եմ` ավելի հարմար առիթ չի լինի. հույս ունեմ, որ մեր համատեղ աշխատանքի արդյունքում ոչ հեռու ապագայում Երևանի արվարձաններից մեկում կմեկնարկի «հայկական Fryshuset-ի» շինարարությունը` համոզմունքով, որ շատ շուտով արդեն այն իր սերմերը կգցի ողջ Հայաստանով մեկ: Դե իսկ մեր շվեդ գործընկերներն իրենց պատրաստակամությունը հայտնեցին մեզ աջակցելու այս հարցում»:
The post Երևանի արվարձաններից մեկում կմեկնարկի «հայկական Fryshuset-ի» շինարարությունը appeared first on ԳԱԼԱ.