საპატრიარქო: ნარკოდანაშაულისთვის დაკავებული ბერი ქართული ეკლესიის წევრი არაა

დიდი ოდენობით ნარკოტიკის უკანონოდ შეძენა-შენახვისთვის დაკავებული ბერი გიგა ქავთარაძე ქართული მართლმადიდებელი ეკლესიის წევრი არაა. 


საქართველოს საპატრიარქოს პრესმდივანი, ანდრია ჯაღმაიძე რადიო თავისუფლებას ეუბნება, რომ გიგა ქავთარაძე 2014-15 წელს ათონის მთაზე აღკვეცეს ბერად და იქ ცხოვრობდა, საქართველოში კი 2017 წელს დაბრუნდა.


“მძიმეა ეს დანაშაული ბერისთვის, მაგრამ ჩვენ ვერ გვექნება ვერანაირი რეაქცია, ვინაიდან ეს ადამიანი არ არის ეკლესიის იურისდიქციაში”, - ამბობს ჯაღმაიძე.


ჯაღმაიძე, ასევე, ამბობს, რომ გავრცელებული ფოტო - რომელზეც დაკავებული ბერი ქართული ეკლესიის მღვდელმსახურთან, მეუფე გერასიმესთან ერთად დგას - არაფერს ნიშნავს. 


“ასე ნებისმიერი ეკლესიიდან ჩამოსული დელეგაცია - თუ რაიმე აკრძალვა არ აქვს მსახურებაში - დგება ჩვენთან შესაბამისი კურთხევით. შეუძლია ერთჯერადად იმსახუროს, ან რამდენჯერაც ექნება სურვილი”, - ამბობს ჯაღმაიძე.


მეუფე გერასიმე “მთავარ” არხთან ადასტურებს, რომ მან პირადად აღკვეცა გიგა ქავთარაძე ბერად.


33 წლის ბერი გიგა ქავთარაძე 4 დეკემბერს ღამით ჩაბარდა პოლიციას. ქავთარაძე ამბობს, რომ მას ეკუთვნის ჩანთა, რომელშიც პოლიციამ ნარკოტიკები აღმოაჩინა.