პერლ ჰარბორის ბაზაზე დაჭრილი ორი ადამიანი გარდაიცვალა

ამერიკელი საზღვაო ქვეითის მიერ პერლ ჰარბორის სამხედრო ბაზაზე ცეცხლსასროლი იარაღით დაჭრილი სამიდან ორი ადამიანი გარდაიცვალა. ინფორმაცია სამხედრო ბაზის სარდლობამ დაადასტურა. მესამე დაჭრილის მდგომარეობა სტაბილურია. 


საზღვაო ქვეითმა, რომლის ვინაობას ჯერჯერობით არ ასახელებენ, თავი მოიკლა. მან ცეცხლი გაუხსნა სამოქალაქო პირებს, რომლებიც აშშ-ის თავდაცვის სამინისტროსთან კონტრაქტით მუშაობდნენ.


4 დეკემბერს მომხდარი ინციდენტის გამო, ჰავაიზე მდებარე სამხედრო-საზღვაო ბაზის და მისი მიმდებარე ტერიტორია დროებით დაიკეტა. გამოძიებას სპეციალური სამსახურები ატარებენ. თეთრ სახლში განაცხადეს, რომ ინციდენტის შესახებ ინფორმირებულია პრეზიდენტი დონალდ ტრამპი.


7 დეკემბერს პერლ ჰარბორის ბაზაზე დაგეგმილია იაპონიის ავიაციის თავდასხმიდან 78-ე წლისთავისადმი მიძღვნილი ღონისძიებები. 1941 წელს განხორციელებულ თავდასხმას, რომლის შემდეგ შეერთებული შტატები მეორე მსოფლიო ომში ჩაერთო, 2400-მდე ამერიკელი ჯარისკაცის სიცოცხლე ემსხვერპლა.