Հնարավոր է` Թրամփ-Էրդողան հանդիպմանը Սիրիայի հարցով պայմանավորվածության դիմաց ԱՄՆ Սենատը չընդունի Հայոց ցեղասպանությունը ճանաչող բանաձևը. Ս. Սարգսյան
ԱՄՆ-ի նախագահ Դոնալդ Թրամփի և Թուրքիայի նախագահ Ռեջեփ Թայիփ Էրդողանի հանդիպումը կայանալու է մի ժամանակահատվածում, երբ երկու պետությունների հարաբերությունները պատմականորեն, հավանաբար, ամենավատ ժամանակահատվածում են գտնվում: Այս մասին Tert.am-ի հետ զրույցում ասաց միջազգայնագետ Սուրեն Սարգսյանը` անդրադառնալով նոյեմբերի 13-ին Վաշինգտոնում կայանալիք Թրամփ-Էրդողան հանդիպմանը:
«Բավականին բարդ ժամանակահատված է, և այն սկզբունքային նշանակություն է ունենալու: Ներկա փուլում գործ ունենք մի իրավիճակի հետ, երբ Թուրքիա-ԱՄՆ հարաբերություններն այնպիսի չեն, ինչպիսին պետք է լինեին այն պետությունների դեպքում, որոնք միմյանց համար ռազմավարական նշանակություն ունեն»,-ասաց Սարգսյանը:
Նրա խոսքով` հարաբերութունների վատթարացման վրա, բնականաբար, իրենց ազդեցությունն են ունեցել ԱՄՆ Ներկայացուցիչների պալատի կողմից Հայոց ցեղասպանությունը ճանաչող բանաձևի ընդունումն ու Սիրիա ներխուժման պատճառով Թուրքիայի նկատմամբ պատժամիջոցներ սահմանելու որոշումը: Հանդիպմանը, ըստ Սարգսյանի, նախևառաջ քննարկվելու է հենց Սիրիայի խնդիրը, ապա նաև` ԱՄՆ Սենատում Հայոց ցեղասպանությունը ճանաչող բանաձևի քննարկման վերաբերյալ ԱՄՆ նախագահից աջակցություն ստանալը:
«Էրդողանը խնդրելու է Թրամփին, որ վերջինս, իր ազդեցությունը կիրառելով Սենատի վրա, կարողանա հօգուտ Թուրքիայի որոշում կորզել: ԱՄՆ Սենատի անդամների մեծամասնությունը, ի տարբերություն ԱՄՆ Ներկայացուցիչների պալատի, հանրապետականներ են, իսկ առաջնորդը Թրամփն է»,-պարզաբանեց միջազգայնագետը` ընդգծելով սակայն, որ դրա դիմաց Թուրքիան ԱՄՆ-ին փոխշահավետ առաջարկ պետք է ներկայացնի:
«Չի բացառվում, որ ԱՄՆ նախագահը կընդառաջի Թուրքիայի նախագահին, եթե վերջինս ինչ-որ առաջարկներ ներկայացնի Սիրիայի վերաբերյալ: Այդ առաջարկները կարող են չափազանց կարևոր և սկզբունքային լինել ԱՄՆ-ի համար, և վերջինս, հաշվի առնելով իր շահերը, փորձի, այսպես ասած, «թուրքերի լավության տակ չմնալ»»,-ասաց Սարգսյանը:
Նա ընդգծեց, որ այս պահին արդեն իսկ նկատելի են Վաշինգտունում Թուրքիայի գործողությունները` կանխելու Սենատի կողմից Հայոց ցեղասպանությունը ճանաչող բանաձևի ընդունումը. լրատվական հոսքեր են ի հայտ գալիս, նաև կան լոբբիստների աշխատանքների վերաբերյալ տեղեկություններ:
«Այս պահին Սենատում բանաձևի անցկացման համար մեր ամբողջ հույսը հայկական կազմակերպությունների ակտիվ, էֆեկտիվ և պրոֆեսիոնալ աշխատանքն է»,-ամփոփեց Սուրեն Սարգսյանը:
Հիշեցնենք, որ հոկտեմբերի 9-ին Թուրքիան Սիրիայի հյուսիս-արևելքում սկսեց «Խաղաղության ակունք» ռազմական գործողությունը: Թուրքիայի պաշտոնական վարկածն այն էր, թե քանի որ այդ հատվածում իշխում են Քուրդիստանի բանվորական կուսակցությանը կից Քրդական ազգային ինքնապաշտպանության ուժերը, որոնք Թուրքիան համարում է ահաբեկչական, իբրև մտնում են ահաբեկիչներին մաքրելու համար:
Ավելի ուշ`հոկտեմբերի 29-ին, ԱՄՆ Կոնգրեսի ներկայացուցիչների պալատում կայացած քվեարկության արդյունքում ձայների մեծամասնությամբ ընդունվեց Հայոց ցեղասպանությունը ճանաչող բանաձևը: Բանաձևի ընդունումն, ըստ որոշ փորձագետների, պայմանավորված էր նաև ԱՄՆ-Թուրքիա հարաբերությունների լարմամբ: