Ukraina baş konsulı Rostov SİZOsında qırımtatar siyasiy mabüslerini ziyaret etti
Bu aqta «Qırım birdemligi» cemaat teşkilâtı haber ete.
Berilgen malümatqa köre, konsul, Nariman Memedeminov, İnver Bekirov, Arsen Cepparov, Refat Alimov, Emir-Usein Kuku, Vadim Siruk, Muslim Aliyevnen körüşti.
Konsulnıñ aytqanına köre, er birinen sıranen laf etti.
«Muslim Aliyev dünyadaki vaziyet, Ukraina ve Rusiye arasındaki munasebetlernen bağlı çoq şey soradı, onıñ davasını da laf ettik. İnver Bekirovnen onıñ sağlığı ve ketirilgen ilâclarnı berüv meselesini ayrıca laf ettik. Tutuv şaraitlerini pek şikâyet etmediler, informatsion açlıq olğanını biraz şikâyet ettiler. Nariman dünyanıñ umumiy vaziyetini çoq soradı, «siyasetni» laf ettik. Energiyası çoq», – dep tarif etti Ukraina diplomatı.
O, Cezalarnı Yerine ketirüv federal hızmeti «Bağçasaraydaki birinci gruppanıñ» dört mabüsinen körüşmege izin bermedi, çünki Moskva olarnı tek Rusiye vatandaşları olaraq tanıy.
«Vaqıt keçsin, olarnen körüşmek içün çare tapacaqmız, amma adiy ziyaretçiler olaraq, Rusiye Ceza-icra kodeksi esasında, amma laf telefonda, qulübede olacaq», – dep qayd etti Malışevskiy.
Cuma künü, noyabrniñ 8-nde, Rostov-na-Donunıñ Cenübiy okrug arbiy mahkemesinde mabüsleri soñki sözüni aytqan Yaltadaki «Hizb ut-Tahrir davasınıñ» oturışuvı keçirile.
ABD OSCE vekili, Kremlni qırımtatar blogerleri ve aq qorçalayıcılarını azat etmesine çağırğan edi.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.