Qarasuvbazarda cemaatçılar qırımtatar ressamı Ramiz Netovkinniñ ev-müzeyini açmağa teklif ete
Konferentsiya çerçivesinde iştirakçileri Qarasuvbazar tarihiy-ülkeşınaslıq müzeyiniñ reberligine qırımtatar ressamı Ramiz Netovkinniñ ev-müzeyini açmağa teklif etti.
«Bestekâr Spendiarovğa ait evniñ sökülüvi Qarasuvbazarda Ramiz Netovkinniñ evi içün qasevetlenmege mecbur etti. Ramizniñ vefat etkeninden sekiz yıl keçti. Dost, zenaatdaş ve tuvğanları Qarasuvbazardaki boş evi unikal ressamnıñ ev-müzeyi olmaq kerek, dep tüşüne. Amma laflardan areketlerge keçmege vaqıt keldi. Konferentsiya vaqtında yerli ülkeşınaslıq müzeyine Netovkinniñ ev-müzeyini açmaq içün bütün meraqlanğan taraflar (tuvğanları, akimiyet) ile iş keçirilmesine dair muracaat qabul etildi», – dep ayttı konferentsiyada faal Eskender İlyasov.
Qarasuvbazar rayon tarihiy-ülkeşınaslıq müzeyiniñ müdiri Marklena Kelâmova cemaatçılarnıñ teşebbüsine qoltutıp, «teklifni yerine ketirmege tırışacaq», dedi.
Ramiz Netovkin 1960 senesi Taşkent vilâyetiniñ Almazar qasabasında dünyağa keldi. 1975 senesinden berli Qarasuvbazarda yaşadı. 1980 senesi Samokiş Aqmescit bediiy oquv yurtunı bitirdi. «Qarasuvbazarnıñ civarları» albomı içün Bekir Çoban-Zade mukâfatınıñ «Qarasuvbazarnıñ keçmişi, bugüni ve kelecegini aks ettirgen eñ eyi eser» kategoriyasınıñ laureatı oldı. 1983 senesinden başlap vilâyet, cumhuriyet ve çetel sergileriniñ faal iştirakçisi oldı.
Aqmescit, Bağçasaray, Kezlev, Aluşta, Moskva (Rusiye), Tartu (Estoniya), Varşava ve Lüblin (Poloniya), New York (ABD), Kastamonuda (Türkiye) şahsiy sergileri keçirildi.
Ressam 2011 senesi iyülniñ 16-nda vefat etti.