Պուտինը արգելեց ռուսական ավիաընկերությունների թռիչքները Վրաստան

Ռուսաստանի նախագահ Վլադիմիր Պուտինը ռուսական ավիաընկերություններին արգելել է թռիչքներ կատարել դեպի Վրաստան: Արգելքը ուժի մեջ է մտնելու հուլիսի 8-ից: Պուտինի ստորագրած հրամանագրի տեքստը տեղադրված է Կրեմլի պաշտոնական կայքում:  Հրամանագրով նաև զբոսաշրջային ընկերություններին է առաջարկվում Վրաստանի ուղեգրեր չվաճառել: Ռուսաստանի  կառավարությանը  հանձնարարվել է ապահովել Վրաստանում ժամանակավորապես գտնվող Ռուսաստանի  քաղաքացիների վերադարձը ու նրանց ուղեբեռի փոխադրումը Ռուսաստան:  


Հրամանագրում նշված է, որ այս  քայլերն արվում են  Ռուսաստանի  ազգային անվտանգությունը ապահովելու նպատակով:


Հունիսի 20-ին Թբիլիսիում զանգվածային բողոքի ակցիա էր բռնկվել: Ոստիկանության և ցուցարարների միջև տեղի ունեցած բախումների հետևանքով ավելի քան 200 մարդ է վիրավորվել: Հանրային դժգոհության առիթը նախօրեին Թբիլիսիում կազմակերպված Ուղղափառության միջխորհրդարանական վեհաժողովի նիստն էր, որը վարում էր հակավրացական հայացքներով հայտնի ռուսաստանցի պատգամավոր Սերգեյ Գավրիլովը: