Putin «Aqmescit» ava limanına Ayvazovskiyniñ adını berüv fermanını imzaladı
Rusiye Devlet dumasınıñ deputatı Natalya Poklonskayanıñ içtimaiy ağlarda bildirgenine köre, bugün Putin «Ava limanlarına Vatan ögünde büyük ğalebelerge irişken şahıslarnıñ adlarını berüv» fermanını imzaladı.
2018 senesi dekabr ayında Aqmescitniñ Rusiye akimiyeti Aqmescit ava limanı içün ressam Ayvazovskiyniñ adı saylandı, dep bildirgen edi.
2015 senesi mayısnıñ 14-nde Ukraina Yuqarı Radası «Aqmescit» ava limanına qırımtatar asıllı sovet uçucısı Amet-Han Sultannıñ adını bergen edi. Onıñ adını Mahaçkala (Dağıstan, Rusiye) ava limanı da taşımaqta.
Qırımtatar halqınıñ lideri, Ukraina halq deputatı Mustafa Cemilevniñ Qırım.Aqiqat Radiosına aytqanına köre, Rusiye akimiyetiniñ Aqmescit ava limanına ressam İvan Ayvazovskiyniñ adını bermek niyetiniñ «iç bir manası yoq», çünki yarımada işğalden qurtarılğan soñ ava limanına eski adı qaytarılacaq.
2018 senesi aprelniñ 16-nda Aqmescitte Rusiye akimiyeti ava limanınıñ yañı terminalını açtı. Onı 22 ay içinde aman-aman 32 mlrd ruble (13 mlrd ğrıvnâ – QA) sarf etip qurğanlar.
Ukraina Qırım üzerindeki ava boşluğından mesüliyetli olğan devlet olaraq Rusiyeniñ Qırım işğalinden soñ onıñ uçaq areketlerini ve ava limanlarını qapattı. Anda ve andan kerçekleştirilgen uçaq seferleri Ukraina ve halqara qaidelerini boza. Daa soñra Qara deñiz üzerindeki bazı yollar vatandaş aviatsiyası içün kene açılğan edi. Rusiye ava şirketleri yasaqqa baqmadan, halqara uquqnı bozıp, ilhaq etilgen Qırımğa uçmağa devam ete.