საპარლამენტო ოპოზიცია თამარ ჟვანიას არჩევნების მთავარ გამყალბებელს უწოდებს

„გაგვაგონეთ თქვენი ხმა იმიტომ, რომ თქვენს ხმას მნიშვნელობა აქვს,“ - ასე მიმართა „ევროპული საქართველოს“ წევრმა გიგა ბოკერიამ ცესკოს თავმჯდომარეს, თამარ ჟვანიას პარლამენტის პლენარულ სხდომაზე, სადაც გაიმართა თამარ ჟვანიას ინტერპელაციის წესით მოსმენა.


გიგა ბოკერიას განცხადებით, ცენტრალური კომისიის თავმჯდომარემ საარჩევნო კამპანიის დროს მომხდარ ძალადობებზე შეფასება უნდა გააკეთოს, ვინაიდან, ის ვალდებულია დაინტერესებული იყოს კლიმატით, რომელიც არჩევნებში თავისუფლებას და კონკურენტუნარიანობას უზრუნველყოფს.


„საარჩევნო კამპანიის დროს ადგილი აქვს ფიზიკურ ძალადობას, მერე ხელისუფლების წარმომადგენლების მხრიდან კეთდება პოლიტიკური განცხადებები, რომ ეს ძალადობები რაღაცნაირად გამართლებულია წარსულით, ხალხის აღშფოთებით, რომ ოპონენტებს მორალური უფლება არ აქვთ და ა.შ. მე მესმის, რომ შეიძლება ეს ყველაფერი ცესკოს უშუალო კომპეტენციაში არ არის, მაგრამ თქვენ პოლიტიკურად პასუხისმგებელი ხართ და ვალდებული ხართ, დაინტერესებული უნდა იყოთ კლიმატით, რომელიც არჩევნებში თავისუფლებას და კონკურენტუნარიანობას მინიმალურად მაინც უზრუნველყოფს".


თამარ ჟვანია გააკრიტიკა „ნაციონალური მოძრაობის“ წევრმა თინა ბოკუჩავამაც. მისი თქმით, ცესკოს თავმჯდომარე „არჩევნების მთავარ გამყალბებლად იქცა“.


„თქვენი დუმილი  ბიძინა ივანიშვილმა მილიონ ლარად იყიდა“, - ამ სიტყვებით მიმართა ცესკოს თავმჯდომარეს თინა ბოკუჩავამ:



“არჩევნების გამყალბებლები არ ისჯებიან და ქალბატონო თამარ, თქვენ ხმას იმის გამო არ იღებთ, რომ არჩევნების მთავარ გამყალბებლად თავად ჩამოყალიბდით. თქვენ ხმას იმიტომ არ იღებთ, რომ ბიძინა ივანიშვილმა თქვენი დუმილი მილიონ ლარად იყიდა. თანამდებობაზე დანიშვნის დღიდან დღემდე აღებული გაქვთ მილიონამდე ლარი ხელფასის, დანამატის და პრემიის სახით. ამაში არ შედის ის ასიათასობით ლარი, რაც თქვენს მივლინებებში იხარჯება. ამაში არ შედის ის ძვირადღირებული მანქანა, რითაც სარგებლობთ, არ შედის თქვენი ბენზინის ფული და ის სარგებელი, რასაც ცესკოს თავზე დაშენებული სასტუმროდან იღებთ. ამ მილიონ ლარში არ შედის ის სარგებელი, რაც თქვენს ოჯახსა და სანათესაოს თქვენი დუმილის შედეგად ხვდა წილად. თქვენი ორივე შვილი, შვილის მეჯვარე, თქვენი და, სიძის და, მაზლის ცოლი ნათესავების მცირე ჩამონათვალია, რომლებიც საარჩევნო ადმინისტრაციაში და მის დაქვემდებარებულ სსიპ-ებში არიან დასაქმებული მას შემდეგ, რაც თქვენ ამ თანამდებობაზე ხართ. ამიტომ ვერ ხედავთ და ვერც დაინახავთ საარჩევნო დარღვევებს და დუმხართ, როცა ბიძინა ივანიშვილი არჩევნების გაყალბების დროს შირმად გიყენებთ“.


კრიტიკის საპასუხოდ თამარ ჟვანია აცხადებს, რომ საარჩევნო კომისიის თავმჯდომარე, ვერ იქნება პოლიტიკური ოპონენტი. მისი თქმით, ცენტრალური საარჩევნო კომისია არაპოლიტიკურ ორგანოდ ტრანსფორმირდა, ყოველგარ პოლიტიკურ დისკუსიაში შესვლას ერიდება და პოლიტიკურ განცხადებებს ვერ გააკეთებს:


„ჩემი პროფესიული სტანდარტი და პროფესიული ღირსება არ მომცემს იმის საშუალებასა და უფლებას თინა ბოკუჩავას გამოსვლას ვუპასუხო, რაც ძალიან სამწუხარო იყო. როდესაც დისკუსია ასეთ პიროვნულ და პირად საკითხებზე გადადის და კითხვა ბრალდებების ჭრილში ისმევა, როცა ადამიანს პიროვნულად ეხებიან, მინდა აღვნიშნო, რომ ეს ძალიან კარგი მაჩვენებელია იმისა, რომ ამ ადამიანებს პროფესიული კუთხით არგუმენტები აღარ რჩებათ“, - განაცხადა თამარ ჟვანიამ.


თამარ ჟვანია პარლამენტში 31 მაისს ფრაქცია „ნაციონალურმა მოძრაობამ“ მიიწვია.