Əmək haqları ilə bağlı təkliflər hazırlanır
«Report» xəbər verir ki, bunu bu gün, mayın 31-də Əmək və Əhalinin Sosial Müdafiəsi naziri Sahil Babayev deyib. O bildirib ki, sosial paketin növbəti mərhələsi hazırlanmaqdadır: «Həm əmək haqları, həm də pensiyalar ilə bağlı yeni təkliflərimiz olacaq. Azərbaycanın iqtisadiyyatı gücləndikcə, gəlirlər artdıqca, ölkə başçısının əsas niyyəti bu gəlirin ilk növbədə əhalinin sosial müdafiəsinə yönəldilməsidir. Buna görə də prezidentin tapşırığı ilə Əmək və Əhalinin Sosial Müdafiəsi Nazirliyi digər aidiyyəti qurumlarımızla birlikdə həm əmək haqları, həm də pensiya sahəsində yeni təkliflər hazırlayıb. Yaxın günlərdə biz bu təklifləri ölkə başçısına təqdim edəcəyik».
Xatırlatma
Bu il Azərbaycanda həm minimum əməkhaqqı, həm pensiyaların minimum məbləği, həm də bir sıra müavinət və təqaüdlər artırılıb. Rəsmilər bunu «sosial paket» adlandırıblar. Amma müxalifət hesab edir ki. Azərbaycanda istər orta aylıq əməkhaqqı, istərsə də pensiyalar bir sıra region ölkələrindəkindən aşağıdır.