Ես մոտ հարաբերություններ ունեմ Վահե Գրիգորյանի հետ, նրա առաջադրումը հակաօրինական չէ․ Արարատ Միրզոյան
«Ես ԱԺ նախագահն եմ և ընդունում եմ բոլոր այն թեկնածուներին, որոնց առաջարկում է նախագահը»։ Այսօր ԱԺ-ում լրագրողների հետ զրույցում նման տեսակետ հայտնեց ԱԺ նախագահ Արարատ Միրզոյանն՝ անդրադառնալով հարցին, որ Հանրապետության նախագահը ՍԴ անդամի համար առաջադրել է Վահե Գրիգորյանի թեկնածությունը։ Միրզոյանը չթաքցրեց, որ ինքը մոտ հարաբերություններ ունի Վահե Գրիգորյանի հետ։ ԱԺ նախագահը շեշտեց, որ պետք չէ Վահե Գրիգորյանն առաջադրումը դիտարկել որպես ՍԴ յուրայինի գործուղում ՍԴ։
«Ես մոտ հարաբերություններ ունեմ Վահե Գրիգորյանի հետ, և դա ձևավորվել է շատ տարիներ առաջ, երբ մենք տարբեր եղանակային պայմաններում տարբեր հարցերով ընդվզման շարժումներ էինք անում։ Երբ հայտնվում էինք ոստիկանական բաժանմունքներում, այնտեղ մեզ հետ էին նաև տարբեր իրավապաշտպաններ, այդ թվում՝ Վահե Գրիգորյանը։ Կարծում եմ՝ նորմալ է, որ մենք այդ տարիներից, շատ հանգամանքներից ելնելով, կարողացել ենք մտերիմ հարաբերություններ ձևավորել։ Իհարկե, չափազանց մեծ դեր է խաղում այն, որ արժեքային համակարգի առումով, երկրի զարգացման տեսլականի, երկրի մասին ունեցած երազանքի առումով բավական մեծ ընդհանրություններ կան»,- ասաց նա։
Արարատ Միրզոյանն անկեղծորեն ասաց, որ Վահե Գրիգորյանի թեկնածությանը չափազանց դրական է վերաբերվում, սակայն «Իմ քայլը» խմբակցության տեսակետի մասին որևէ բան չասաց։
Ինչ վերաբերում է ընդդիմության պնդումներին, որ Վահե Գրիգորյանի առաջադրումը հակաօրինական քայլ է, քանի որ օրենքը հստակ ասում է՝ իրավասու մարմինը մեկից ավելի անգամ չի կարող նույն անձի թեկնածությունն առաջադրել, ԱԺ նախագահն ասաց, թե ամենևին համամիտ չէ այս գնահատականի հետ։
«Բերեք այդ կամայական մեկնաբանությունները թողնենք։ Նոր թեկնածություն է սա, խնդիր չկա։ Իրավաբանների հետ հազար անգամ խորհրդակցություն է եղել, այս թեման հրապարակային քննարկվել է»,- շարունակեց Արարատ Միրզոյանը։
Հիշեցնենք, որ երեկ խորհրդարանը կողմ չքվեարկեց ՀՀ նախագահ Արմեն Սարգսյանի կողմից առաջադրված Սահմանադրական դատարանի թեկնածու Արթուր Վաղարշյանի օգտին։ 7-րդ գումարման ԱԺ-ում սա արդեն ՍԴ դատավորի թեկնածուի ընտրման 3 փորձն է, իսկ 6-րդ գումարման ԱԺ-ում 2 անգամ է տապալվել ՍԴ անդամ ընտրելու գործընթացը։