Հասկանում եմ գայթակղությունը մեծ է իմ հաշվին հայտնի դառնալու, բայց թույլ չենք տա, դուք դեռ երկար պետք է աշխատենք, որ կլասիկի մակարդակին հասնեք․Մարուքյանը՝ Դանիելյանին
«Իմ քայլը» խմբակցության պատգամավոր Համազասպ Դանիելյանի ելույթից հետո ելույթի ձայն խնդրեց նաև ԼՀԿ խմբակցության ղեկավար Էդմոն Մարուքյանը։
«Հասկանում եմ, գայթակղությունը մեծ է իմ հաշվին ինքնահաստատվելու և իմ հաշվին հայտնի դառնալու, որովհետև հայտնի բան կա, ասում է՝ խփում ես հայտնի մարդուն, իր հաշվին սկսում ես կայանալ։ Մենք անգամ դա չենք թույլ տալու, ձեր ելույթի մեջ 67 անգամ «պարոն Մարուքյան» նշելով՝ դուք դեռ երկար պետք է աշխատենք, որ կլասիկի մակարդակին հասնեք»,-ասաց նա։
Մարուքյանը շարունակեց, թե հիմա ինքը խոսում է ընդամենը սկզբունքայնության մասին և ուզում է հասկանալ՝ իշխանությունը դա պահո՞ւմ է, թե՞ ոչ։ Նա հիշեցրեց, որ իշխանությունները ժամանակին հայտարարել են, որ բուհի դուռը փակողը ռեկտոր չպետք է լինի, բայց հիմա նշանակվել է, ասել են՝ բուհերը ապաքաղաքականացվելու են, բայց «Իմ քայլից» քանի պատգամավոր կա, որ բուհի հոգաբարձուների խորհրդի անդամ է։
«Ուրախ եմ, որ Մարուքյանի թեմայով գիտությունների թեկնածություն եք արդեն պաշտպանում, ինչ գրում եմ, ասում ես՝ այստեղ այն ասաց, այն շեշտեց. շոյված եմ, բայց ինչ ասում եմ, ինչը ձեզ ներվայնացնում է, դա էլ է նորմալ: Մի դրեք, այս ներվայնացումը այս ամբիոնից տարածեք։ Հիմա թունավոր ելույթ էր, տոքսիկ նյութեր տարածեցիք... ասենք մի հատ ժպտացեք, առավոտ է, գարնան վերջին օրն է: Կարելի՞ է այդքան չկամություն տարածել այս ամբիոնից, այստեղից էլ տարածել մարդկանց տները»,-ասաց Մարուքյանը։
ԼՀԿ խմբակցության ղեկավարը նշեց, որ եթե «Իմ քայլի» պատգամավորներին թվում է՝ նրանք ինչ անեն, ԼՀԿ-ն նստելու է ու նայի, սխալվում են։ «Մենք դիտորդ չենք այստեղ, մենք ասել ենք, որ այո՛, հեղափոխության արժեքները պաշտպանում ենք, իսկ արժեքը ո՞րն է՝ սկզբունքայնությունն է, այն է, որ բուհերը պետք է ապաքաղաքական լինեն: Հիմա դու ի՞նչ գործ ունեք այնտեղ, պարո՛ն Հովհաննիսյանն: Ասում եք՝ ամեն ինչ արել եմ, որ բուհը չապաքաղաքականցվի, բայց ձեր լինելը (ԵՊՀ հոգաբարձուների խորհրդի կազմում/խմբ.) արդեն կասկած է առաջացնում»,-ասաց նա։
«Ես սպասում եմ, հարցը ամենաբարձր մակարդակով բարձրացված է, որ իշխանության այն մարդիկ, ովքեր քաղաքական պաշտոններ են զբաղեցնում, լքեն բուհերի հոգաբարձուների կամ կառավարման խորհուրդները: Սա ընդդիմության կողմից ձևավորված պահանջ է: ԲՀԿ-ն, կարծում եմ, կհամաձայնի: Կողմնորոշվե՛ք կամ մանդատը թողեք, գնացեք՝ սա է մեր պահանջը»,-հավելեց Մարուքյանը: