Түркістан облысында жыл басынан бері жол апатынан 85 адам қаза тапқан
Бүгінде, күнделікті жаңалықтардан "жол апаты болды", "жолаушылар жараланды, адам шығыны бар" деген сынды ақпараттардың бір-екеуін міндетті түрде еститін болдық. Соңы адам өліміне алып келетін, болмаса жазатайым мүгедек ететін, түрлі деңгейдегі дене жарақатын салатын жол апаты жүргізушінің салғырттығынан десек қателеспейміз. Мұндай апаттардың алдын алу үшін қандай шаралар жасауға болады?! Түркістан облысында жыл басынан бері 337 жол-көлік оқиғасы орын алып, 85 адам қайтыс болса, 500-ге жуық жолаушы жарақаттанған. Аталған жол-көлік оқиғаларының негізгі себебі-көлік жүргізушілерінің тәртібінің төмендігі мен жол ережесін сақтамайтын салғырттығының салдары, - деп хабарлайды Тengrinews.kz тілшісі Түркістан облысы ПД баспасөз қызметіне сілтеме жасап.
Мысалы, ұзақ жолға шыққанда шектен тыс жылдамдықпен жүру, ұйықтап кетіп көлік тізгінін басқара алмау, жолдың қарсы бетіне шығып кету, мас күйде көлік басқару, жол ережесіін білмеу, көліктің кейбір тетіктері дұрыс жұмыс жасамаудың ақыры-орны толмас қайғыға алып келеді. Түркістан облысы Полиция департаменті жергілікті полиция қызметі тарапынан облыс аумағындағы республикалық, облыстық маңызы бар және жергілікті автожолдарында, облыс орталығы мен елдімекендердің көшелерінде орын алған жол-көлік оқиғаларына ай сайын терең сараптама жүргізіледі.
Осы сараптаманың негізінде Республикалық маңызы бар жол-көлік апаты көп орын алатын жері , яғни взводтардың әрбір бағыты километрден бөлініп, жалпы қызмет атқаратын 13 патрульдік аумақта авариялық аумақтар анықталған. Осындай сараптама облыстық және жергілікті маңызды автожолдарға да жүргізілуде. Көбіне жол-көлік оқиғалары көлік жүргізушілерінің белгіленген жылдамдықты асырып, қарсы бағытқа шығып кетіп, ЖЖҚ-ның талаптарын өрескел бұзу себебінен орын алуда деп айта аламыз.
Жол-көлік оқиғаларын алдын алу, сондай-ақ облыс автожолдарында қалыптасқан жедел жағдайды жақсарту, автоапаттылық деңгейін азайту мақсатында, Көлікті бақылау инспекциясы, Мемлекеттік кіріс департаментінің қызметкерлері және басқа да қоғамдық өкілдерінің қатысуымен 2019 жылғы 17-19 қаңтар күндері облыс аумағында "Автобус", 14-16 ақпан аралығында "Қауіпсіз жол!", 27-29 наурыз аралығында "Заңсыз тасымалдау", 16-18 мамыр аралығында "Автобус" жедел-профилактикалық іс-шаралары өткізілген. Өздеріңізге белгілі жол апатының алдын алу бойынша түрлі іс-шаралар өткізіліп, қас-қағым сәтте орын алатын жол-көлік оқиғалары жайлы ой салар бейнекөріністер көрсетіліп жатыр, алайда оған қарамастан жол-көлік оқиғалары төмендемеуде. Сол себепті, қазіргі таңда, Түркістан облысы ПД ЖПҚ-нің басшылығымен жолдардағы авариялық учаскелердің және облыс көлеміндегі авариялық жағдайды жүргізушілердің назарына жеткізу мақсатында суреттер енгізілген көрнекі кітапшалар, роликтер даярланып, Түркістан облысы ПД баспасөз қызметімен бірлесіп, үгіт-насихат жұмыстарын жүргізілуде алда мұндай жұмыстарды жандардыру басты назарда.
Облыс бойынша, 2019 жылдың 4 айында жол-патрульдік полициясысаптық бөліністерінің жеке құрамымен жол қозғалысы қауіпсіздік саласы бойынша жалпы 60198 құқықбұзушылық анықталды, бұл 2018 жылмен салыстырғанда 19907 құқықбұзушылыққа жоғары болып тұр. Оның ішінде, жол-көлік оқиғаларына және оның ауырлығына тікелей әсер ететін 7 басым бағыт бойынша 23853 құқықбұзушылықтар анықталып, былтырғы жылмен салыстырғанда, 3669-ға өскен. Соңғы кездері жан түршігерлік жол-көлік оқиғалары жиілегені барлық саналы адамды ойландырады.
Тіпті, ТО ПД-нің полицейлерінің ұйымдастыруымен мектеп оқушылары да жол апаты жайлы ойларын қағаз бетіне түсіріп, көлік жүргізуші ағаларына тілектерін білдірді. Жасөспірім оқушылар: "Көлік айдағанда абай болыңыздар, жүргізуші куәлігін заңға сай оқып алыңыздар, балабақша мен мектеп айналасында жылдамдықты асырмаңыздар, себебі үйлеріңізде отбасыларыңыз, біз сияқты балаларыңыз күтіп отыр",-деп жазылған шығармаларын "Жүргізушіге хат" деген тақырыппен жазды. Апат айтып келмейді дегенменде, барлық әрекетіңіз ережеге сай тиянақты болса, апаттың сізге келмейтіні анық. Бәрін айтта, бірін айт Құрметті көлік жүргізушілері "Сақтансаң, сақтаймын"-деген сөзді көлік жүргізгенде негізгі ұраныңызға айналдырыңыз. Өйткені, сіздің немқұрайлығыңыздың нәтижесінде, өз өміріңіз бен өзгенің өмірі әп-сәтте құрдымға кетуі мүмкін. Сондықтан ойланыңыз. Жолда барынша абай болып, қауіпсіздік шараларын сақтаңыз.