Պնդում ենք,որ Հայաստանը ԵՄ արտաքին բոլոր հարթակներում դիտարկվի Ասոցացման համաձայնագրի քաղաքական հատվածը ստորագրած երկրների շարքում. Արման Եղոյան
Հայաստանը ԵՄ արտաքին բոլոր հարթակներում դիտարկվի Ասոցացման համաձայնագրի քաղաքական հատվածը ստորագրած երկրների շարքում: Այս մասին Tert.am-ի հետ զրույցում ասաց «Իմ քայլը» խմբակցության պատգամավոր Արման Եղոյանը՝ խոսելով Բուխարեստ կատարած այցի մասին, որտեղ տեղի ունեցավ ԵՄ ապագային նվիրված կոնֆերանս, ԵՄ Արևելյան գործընկերության ընթացիկ հարցերին վերաբերող քննարկում:
Եղոյանն ասաց, որ մասնակցում էին Հայաստանը, Վրաստանը, Մոլդովան, հրավիրվել էր Ուկրաինան, բայց նրանց ներկայացուցիչը նախագահական ընտրությունների պատճառով չէր կարողացել մասնակցել:
Արման Եղոյանի խոսքով՝ հետաքրքիր քննարկումներ ծավալվեցին ԵՄ-ում տեղի ունեցող զարգացումների, պետությունների հետ հարաբերություններ կառուցելու վերաբերյալ:
«Միայն այն փաստը, որ տեղի ունեցավ նման ընդգրկվածությամբ քննարկում, ինքնին դրական է: Այս պետությունների ներկայացուցիչները լսեցին ՀՀ դիրքորոշումը: Նկատեցինք Ռումինիայի հետ հարաբերությունների զարգացման մեծ հեռանկարներ: Կա չբացահայտված պոտենցիալ: Մենք վերադարձանք Բուխարեստ-Երևան առաջին չվերթով և կարծում եմ, որ կա հանրությանը Բուխարեստում առկա հայկական ժառանգությունը ներկայացնելու, տուրիզմը զարգացնելու հնարավորություն»,- նշեց Ա. Եղոյանը:
Դիտարկմանը, թե ընդդիմախոսները քննադատում են, որ Հայաստանում տեղի ունեցած իշխանափոխությունից հետո չարդարացված սպասումներ կան, թե Եվրամիությունը պետք է փոխի իր դիրքորոշումը Հայաստանի նկատմամբ, Արման Եղոյանն արձագանքեց այսպես. «2013թ.-ին Հայաստանը չստորագրեց ԵՄ հետ Ասոցացման համաձայնագիրը: Ես ներկայացրի Հայաստանում տեղի ունեցած փոփոխությունները, փաստարկեցի, որ Հայաստանում տեղի են ունեցել բարեփոխումներ, որոնք միգուցե ավելին են, քան կարող էին լինել Ասոցացման համաձայնագիրը ստորագրելու դեպքում: Խոսքը քաղաքական հատվածի մասին է, ոչ թե տնտեսական: Բացատրեցի, որ Ասոցացման համաձայնագիրը ստորագրել-չստորագրելուց ելնելով չէ, որ պետք է որոշվի Հայաստանի տեղն ու դերը»:
Ինչ վերաբերում է քննադատությանը, որ նոր իշխանությունները ԵՄ հետ հարաբերություններում առաջնորդվում է իներցիայով, չկա որևէ նոր պայմանավորվածություն կամ փաստաթուղթ, Արման Եղոյանը պատասխանեց, որ հիմա ՀՀ-ԵՄ ստորագրված փաստաթուղթը կիրարկվում է և դա իներցիա չէ:
«Մենք պնդում ենք, որ Հայաստանը ԵՄ արտաքին բոլոր հարթակներում դիտարկվի Ասոցացման համաձայնագրի քաղաքական հատվածը ստորագրած երկրների շարքում: Եթե իներցիայով շարունակելու լինեինք, պետք է ընդունեինք, որ ավելի նվազ ենք համագործակցում ԵՄ հետ, քան ԱլԳ մյուս երկրները, բայց դա այդպես չէ: ԵՄ-ն իր ծրագրերը մեկ տարով չէ պլանավորում, երկարաժամկետ կտրվածքով է պլանավորվում: Կան ծրագրեր որոնք սկսվում են, կան որոնք ավարտվում են և նոր ծրագրերը, նոր սկսվող ծրագրերը պետք է իրենց որակով ու ծավալներով լինեն ավելի ընդգրկուն, քան՝ նախորդները»,- մանրամասնեց Արման Եղոյանը: