Վերջին 10 տարիների ընթացքում «Հայաստան» հիմնադրամի հեռուստամարաթոնի արձանագրած արդյունքները, իրականացված ծրագրերը
Ներկայացնում ենք «Հայաստան» հիմնադրամի հեռուստամարաթոնի արձանագրած նախորդ տասը տարվա ցուցանիշները, թե որքան գումար է հավաքագրվել և ինչ ծրագրերի են դրանք ուղղվել:
2008
2008թ. հեռարձակվել է 11-րդ ամենամյա հեռուստամարաթոնը, և արձանագրվել է 35 միլիոն 9156 ԱՄՆ դոլարի նվիրատվություն և նվիրատվության խոստում: Հեռուստամարաթոնի ընթացքում նվիրաբերված գումարներն ուղղվել են Հայաստանի ու Արցախի գյուղերում ենթակառուցվածքների վերականգնմանը:
2009
Հայաստան հիմնադրամի 12-րդ հեռուստամարաթոնն արձանագրել է 15.875.043 ԱՄՆ դոլարի նվիրատվություն և նվիրատվության խոստում: Նվիրաբերված գումարներն ուղղվել են Շուշիում սոցիալական ու տնտեսական ենթակառուցվածքների` ջրագծերի, դպրոցների, ճանապարհների, բնակելի շենքերի տանիքների վերանորոգմանը:
2010
Հեռուստամարաթոն 2010-ը արձանագրել է 20,8 միլիոն դոլար: Հեռուստամարաթոնի նվիրատվություններով ջրամատակարարման բարելավման ծրագրեր են իրագործվել և իրագործվում ԼՂՀ Ստեփանակերտ, Շուշի, Մարտունի, Բերձոր քաղաքներում, Մարտունու շրջանի Կարմիր Շուկա և Սարգսաշեն, Շուշիի շրջանի Քարին տակ, Հադրութի շրջանի Տող, Հարթաշեն, Ակնաղբյուր, Ուխտաձոր, Մարտակերտի շրջանի Վանք, Չափար, Ասկերանի շրջանի Այգեստան, Նորագյուղ, Ավետարանոց, ինչպես նաև ՀՀ Տավուշի մարզի Վազաշեն ու Այգեհովիտ համայնքներում: Արդյունքում` շուրջ 27000 մարդ ունի մաքուր խմելու ջուր և կանոնավոր ջրամատակարարում:
2011
«Հայաստան» համահայկական հիմնադրամի 14-րդ հեռուստամարաթոնին արձանագրվել է
12.286.478 ԱՄՆ դոլարի նվիրատվություն և նվիրատվության խոստում: Նվիրաբերված գումարները ուղղվել են Արցախի ջրամատակարարման ոլորտի բարելավմանն ու Հայաստանի գյուղական համայնքների ենթակառուցվածքների զարգացմանը:
2012
Համահայկական դրամահավաք-հեռուստամարաթոնն արձանագրել է 21 422 477 ԱՄՆ դոլարի նվիրատվություն և նվիրատվության խոստում, որոնք ուղղվել են Արցախի գյուղական շրջաններում համայնքային կենտրոնների կառուցմանն ու սիրիահայության հրատապ խնդիրների լուծմանը:
2013
16-րդ հեռուստամարաթոնն արձանագրել է 22 661 372 ԱՄՆ դոլար նվիրատվություն և նվիրատվության խոստում, որը նպատակաուղղվել է Հայաստանում և Արցախում մի շարք ծրագրերի իրագործմանը և գլխավորապես Հիմնադրամի հոգաբարձուների խորհրդի կողմից տարվա ռազմավարական ծրագիր ճանաչված շուրջ 116կմ երկարությամբ Վարդենիս-Մարտակերտ ճանապարհի կառուցմանը:
2014
17-րդ հեռուստամարաթոնն արձանագրել է 12 399 550 ԱՄՆ դոլարի նվիրատվություն և նվիրատվության խոստում: Հավաքագրված գումարն ուղղվել է հայկական երկու հանրապետություններն իրար կապող շուրջ 116կմ երկարությամբ Վարդենիս-Մարտակերտ ավտոճանապարհի ասֆալտապատմանն ու հարդարմանը, ինչպես նաև բարերարների կողմից ընտրված հատուկ ծրագրերին Հայաստանում և Արցախում:
2015
«Մեր տունը» խորագրով համահայկական Հեռուստամարաթոն 2015-ն արձանագրել է 10 378 465 ԱՄՆ դոլարի նվիրատվություն և նվիրատվության խոստում: Հավաքագրած գումարն ուղղվել է Արցախում 5 և ավելի երեխաներ ունեցող ընտանիքներին տներով ապահովելուն, ինչպես նաև բարերարների կողմից ընտրված նպատակային ծրագրերի իրականացմանը Հայաստանում և Արցախում:
2016
«Հայաստան» համահայկական հիմնադրամի Հեռուստամարաթոն 2016-ը, որն անցկացվել է «Իմ Արցախը» խորագրի ներքո, արձանագրել է 15,428.777 ԱՄՆ դոլարի նվիրատվություն և նվիրատվության խոստում: Հանգանակությունները կնպատակաուղղվեն Արցախի տուժած բնակավայրերի վերականգնմանը, խաղաղ բնակչության անվտանգությանն ու պաշտպանությանն ուղղված միջոցառումներին, ինչպես նաև Արցախի բազմազավակ ընտանիքների համար առանձնատների կառուցմանը:
2017
«Բերքառատ Արցախը» «Հայաստան» համահայկական հիմնադրամի Հեռուստամարաթոն 2017-ի ընթացքում արձանագրվել է 12.505.456 մլն ԱՄՆ դոլարի նվիրատվություն և նվիրատվության խոստում։ Գումարն ուղղվել է երկու խոշոր ծրագրի. նախ Արցախի տարածքում իրականացվել է խորքային հորերի հորատում ու նոր ոռոգման ցանցի կառուցում, երկրորդ՝ Արցախում տեղակայվել են արևային էներգետիկ:
Հիշեցնենք, որ այս տարի` 2018 թվականին «Հայաստան» համահայկական հիմնադրամին նվիրաբերվել է 11 մլն 109 հազար 633 դոլար։
Նշենք, որ Հեռուստամարաթոնն ամեն տարի իրականացվում է ԱՄՆ-ի Լոս Անջելես քաղաքում։ Գործունեության 25 տարիների ընթացքում Հիմնադրամը մոտ 700 000 նվիրատուների շնորհիվ ավելի քան 50 000 ծրագիր է իրականացրել Հայաստանում և Արցախում՝ ընդհանուր 350 միլիոն ԱՄՆ դոլար արժողությամբ: Կառուցվել, վերակառուցվել և իրականացվել են ավելի քան 605 կմ ճանապարհ, 580 կմ ջրագիծ ու ջրատար, 149 կմ գազամուղ, 70 կմ էլեկտրագիծ, 359 դպրոց և մանկապարտեզ, 24 համայնքային կենտրոն, 500 տուն և բնակարան, 75 առողջապահական հաստատություն, 58 մշակութային ու սպորտային կենտրոն, 100 ջերմոց, 169 կրթական, մշակութային ու գիտական ծրագրեր: