Çiygoz: ukrain faali Baluh Keriç koloniyasında buluna
Ukrain faali Vladimir Baluhnıñ ömür arqadaşı Natalya bildirgenine köre, aqayı Keriç koloniyasına avuştırılmaq kerek edi.
Rusiye akimiyeti ve Baluhnıñ advokatlarından resmiy bir izaat daa yoq.
Daa evel belli olğanı kibi, Baluh açlıqnı vaqtınca toqtatmağa qarar aldı.
Advokat Dmitriy Dinzeniñ malümatına köre, Baluh 200 künden berli açlıq tutqan soñ ülser ya da pankreatit şübesi bar.
Bundan evel Kreml nezaretindeki Qırım Yuqarı mahkemesi 5 yılğa mahküm etilgen Vladimir Baluhnıñ ükmüni qısmen yımşatıp, onı 4 yıl ve 11 ay umumiy rejim koloniyasında qalmasına ve 10 biñ ruble (tahminen 4 biñ ğrıvnâ) para cezasını ödemesine üküm etti. Faal eki cinaiy iş boyunca tevqif etildi.
Qırımda apiste tutulğan ukrain faali Vladimir Baluh 2018 senesi martnıñ 19-nda başlağan müddetsiz açlıqnı devam ete. Bir aydan berli bir şey aşamağan Baluh Arhiyepiskop Klimentni diñlep, kisel içmege, peksimet aşamağa razı olğan edi.
FSB Vladimir Baluhnı 2016 senesi dekabrniñ 8-nde tuttı. FSB hadimleri Vladimir Baluh yaşağan evniñ çardaqında 90 patron ve bir qaç trotil taş tapılğanını bildirgen edi. Baluhnıñ imayesi ve aq qorçalayıcıları onıñ Ukrainağa qoltutqanı içün repressiyalarnıñ qurbanı oldı, dep tüşüneler. Onıñ evinde Ukraina bayrağı bar edi.
«KrımSOS» cemaat teşkilâtınıñ koordinatorı Tamila Taşeva bildirgenine köre, Keriçniñ №2 koloniyasında mabüsler azaplarğa oğratıla.
Keriçniñ №2 koloniyasında cezasını çekken 70-ke yaqın mahküm memuriyet ve oña boysunğan mabüsler tarafından köteklengenlerini bildirgen edi.
Halqara uquq eksperti Yevgeniya Andreyükniñ aytqanına köre, ukrain aq qorçalayıcılarınıñ esabatı içün toplanğan malümat, Keriçteki №2 koloniyasında tutulğan mabüslerni Omsktan kelgen Rusiyeniñ cezalarnı yerine ketirüv federal hızmetiniñ hadimleri köteklegen edi.