Թրամփը գանգատվել է, որ իրեն «անարդարացիորեն» մեղադրում են ՌԴ-ի հանդեպ մեղմ լինելու համար
Միացյալ Նահանգների նախագահ Դոնալդ Թրամփը գանգատվել է, որ «կեղծ լրատվամիջոցներն» իրեն անարդարացիորեն մեղադրում են Ռուսաստանի և Հյուսիսային Կորեայի հանդեպ վերաբերմունքի համար: Ըստ շատերի՝ Թրամփը շատ մեղմ է Ռուսաստանի հետ վարվող քաղաքականության մեջ և չափից դուրս կոշտ Հս. Կորեայի հետ հարաբերություններում, գրում է «РИА Новости» գործակալությունը:
«Նրանք ասացին, որ ես շատ բարի եմ եղել Ռուսաստանի հետ և շատ կոշտ Հս. Կորեայի հետ: Եթե ես շատ կոպիտ լինեի ՌԴ-ի հետ, նրանք կասեին, որ շատ եմ կոշտ: «Ֆեյքային» նորություններ, այդ ամբողջը կեղծ է», - ասել է Թրամփը:
Նշենք, որ ներկայում ԱՄՆ-ում շարունակվում է Ռուսաստանի՝ ամերիկյան նախագահական ընտրություններին միջամտելու ու Մոսկվայի միջամտությամբ Թրամփի հաղթանակն ապահովելու կասկածանքով հետաքննությունը: Թեև ՌԴ-ն պարբերաբար հերքում է նման մեղադրանքները, Թրամփը կարծում է, որ այդ հետաքննությամբ իր հակառակորդ Դեմոկրատական կուսակցության ներկայացուցիչները ցանկանում են խաթարել իր նախագահության լեգիտիմությունը:
Հիշեցնենք, որ Հս. Կորեայի առաջնորդ Կիմ Չեն Ընի հետ Թրամփի առաջին պատմական հանդիպումը կայացել է հունիսի 12-ին Սինգապուրում, ինչի համար նա, ի դեպ, այս տարվա Խաղաղության նոբելյան մրցանակի հավակնորդների թվում է: