Rusiye apisinde tutulğan aqyarlı Zeytullayev «Hizb ut-Tahrir işi»niñ yañı iştirakçisi boyunca şaatlıq yapmağa red etti
Onıñ malümatına köre, FSB hadimleri Zeytullayevni Başqortıstannıñ Salavat koloniyasında ziyaret etip, Seytosanovğa qarşı şaatlıq yapmağa talap etken ve red etken taqdirde, şaatlıq etmegeni içün onıñ özüne qarşı cinaiy iş açacaqlarınen qorquzğanlar. Zeytullayev Rusiye Anayasasınıñ 51 maddesine bazanıp red etken. Redni vesiqalandırmaq içün şaatlar davet etilgen, Zeytullayev onı da imzalamağa red etken. Bu maalde iç bir adliyeci yoq eken, FSB hadimleri ise yerli soyları olaraq, Qırımda çalışqan meslekdeşleriniñ avalesini yapa ekenler.
«Seytosmanov Rusiyede yasaqlanğan Hizb ut-Tahrir firqasına alâqadar olğanında qabaatlana. Tahqiqatnıñ versiyasına binaen o, «Aqyar bölüginiñ» azası eken, faqat onıñ işi ayrı bir iş olaraq baqılmaqta. Qabaatlağan taraf bölük teşkilâtçısı Zeytullayev olğanını iddia ete ve bu mesele Şimaliy –Kavkaz okrugınıñ arbiy mahkemesinde keçken ilk mahkeme oturışuvında tasdıqlanğan edi. Sunıñ içün Seytosmanovqa qarşı yapılğan şaatlıq Zeytullayevniñ özünen ve bu iş boyunca mahküm etilgen Rustem Vaitov, Ferat Seyfullayev ve Nuri Primovke de alâqası bar. Tahqiqatçı qorquzğanına baqmadan 51 maddege bazanıp şaatlıq etmeyüv, onıñ uquqiy ceetten tamamile aqlı olğanını köstere», – dep ikâye etken Azatlıq Radiosınıñ muhbirine adliyeci Emil Kurbedinov.
Enver Seytosmanov Rusiye Cinaiy kodeksiniñ 205.5 maddesiniñ 2-nci qısmı boyunca «Terroristik teşkilâtnıñ faaliyetinde iştirak etüv»de qabaatlana. Rusiye telükesizlik hadimleri ağa-qardaş Ernes ve Enver Seytosmanovlarnı mayısnıñ 10-nda Aqyarnıñ Balıqlava rayonındaki Hayto (Tılovoye) köyünde, anda yapılğan tintüvlerden soñ tutıp aldı.
Daa soñra Ernes yiberildi. Enverge cinaiy işniñ açılması boyunca qarar taqdim etildi. Ertesi künü Rusiyeniñ kontroli altındaki Aqyarnıñ Leninskiy rayon mahkemesi Enver Seytosmanovnı tevqif etti.
Mevzuğa dair: Terrorizm şübhesi ile parmaqlıqlar artında: daa bir qırımlı «Hizb ut-Tahrir işi» boyunca tevqif etildi»
Zeytullayev Rusiyede ve ilhaq etilgen Qırımda yasaqlanğan «Hizb ut-Tahrir» teşkilâtınıñ bölügini teşkil etkeninde qabaatlanıp mahküm etilgen edi.
2017 senesi iyül ayında Rusiye Yuqarı mahkemesi Zeytullayevniñ apis müddetini 15 yılğa arttırdı. Buña cevap olaraq Aqyar sakini açlıq ilân etti. «Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.