Veciye Kaşka vefatından evel yapılğan tevqiflernen alâqalı videoqaydlarnı bellisiz telükesizlik organları tutıp alğan – Polozov
«Meraqlı bir incelik: Veciye Kaşka tüşmesi mumkün olğan bütün videokamera qaydlarını aynı künü yani nayabrniñ 23-nde bellisiz küç idaresi iç bir vesiqasız tutıp alğan. Şimdilik olarnıñ ne yerde olğanı ya da asılda bar olğanı hususında iç bir şey belli degil.Men artıq bu material köleminen tanışmaq, ve o zaman onıñ mundericesine köre nevbetteki adımlarnı atmaq içün, teşkerilgen material prokuraturadan taqiqatqa keri qaytqanını bekleyim», – dep qayd etti adliyeci.
Rusiye küç idaresi hadimleriniñ bu hususnen bağlı daa bir açıq izaatı yoq.
Fevralniñ başında Polozov, 2017 senesinde Qırımda Veciye Kaşkanıñ vefatını mustaqil surette taqiq etmege başladı. Onıñ aytqanına köre, Veciye Kaşkanıñ ölümi – «onı qanunsız olaraq tutqan Rusiye küç idaresi hadimleri tarafından quvetniñ adden aşırı ve ğayrı-mutenasip derecede qullanılmasınıñ neticesidir».
2017 senesi noyabrniñ 23-nde Aqmescitte Rusiye kiç idaresiniñ hadimleri bir gruppa qırımtatarlar – Kâzim Ametov, Asan Çapuh, Ruslan Trubaç ve Bekir Degermencini tutıp aldılar. Olar Türkiye vatandaşından para talap etüvde qabaatlandı. Olar Rusiye küç idaresi hadimleri tarafından tutulğan maalde Veciye Kaşka yaramayıp, vefat etti.
Ukrainada yerleşken Qırım MC prokuraturası qanunsız tintüvler, insanlarnıñ tutulıp alınuvı ve qırımtatar milliy areketiniñ veteranı Veciye Kaşka vefatı sebebinden cinaiy iş açqan edi.
Veciye Kaşka – qırımtatar milliy areketiniñ veteranı. O, 1934 senesinde Aluştanıñ civarındaki Üsküt (şimdi Privetnoye) köyünde doğa. 1944 senesinde qırımtatar halqı sürgün etilgen soñ Veciye Kaşka qorantasınen Özbekistanda yaşay. 50-nci yıllarda o, aqayı Bekir ile beraber qırımtatar milliy areketine qoşula.