5 գործոն, որոնցով պայմանավորված՝ տնտեսության մեջ ռեալ արդյունք կտեսնենք. Գագիկ Մակարյան
Հայաստանի գործատուների հանրապետական միության նախագահ Գագիկ Մակարյանը Tert.am-ի հետ զրույցում նշեց, որ մի քանի ամսից տնտեսության մեջ կտեսնենք ռեալ արդյունքներ՝ կառավարության գործունեության արդյունքում, և դրա համար թվարկեց հինգ գործոն:
Առաջին գործոնը նա համարեց գործարարների համար ներկրման գործընթացի հեշտացումը: «Հիմա գործարարները շատ ինտենսիվ սկսում են զբաղվել ներկրմամբ, իսկ առաջ չէին համարձակվում, քանի որ համարում էին, որ անհավասար մրցակցություն կլինի, սահմանին ձևակերպում չեն իրականացնի, բայց քանի գնում է, այդ ռիսկը նվազում է, և տեսնում են, որ գործընթացը հեշտանում է»,- ասաց նա:
Երկրորդը` Գագիկ Մակարյանը նկատեց, որ ներկրողներն ավելի շատ կշահեն, քանի որ փաստաթղթավորումը շատ ավելի օրինական է կատարվում: «Այսինքն՝ առաջ բերված հաշիվ-ապրանքագիրը հիմք չէին ընդունում, և մաքսավորները միշտ ապրանքներն ավելի թանկ էին հաշվարկում, ինչի արդյունքում ներկրողն ավել գումարներ էր կորցնում, կամ կոռուպցիոն ռիսկեր էին առաջանում, կամ էլ դիտավորյալ այնպես էր արվում, որ անհավասար մրցակցության պատճառով էլ չներկրեր, այսինքն՝ իր ապրանքը ստացվեր շատ ավելի թանկ ու ոչ եկամտաբեր: Հիմա արդեն ասում են, որ ձևակերպումներն իրականացվում են հաշիվ-ապրանքագրերի հիման վրա, այսինքն՝ վստահում են այդ փաստաթղթերին»,-ասաց նա:
Մակարյանն աբսուրդ համարեց, որ Եվրոպայից, նույնիսկ ԵԱՏՄ-ից բերվող ապրանքների հետ կապված կարող են նման խնդիրներ լինեին, և նշեց, որ այլ բան է, եթե մաքսային ծառայությունները չվստահեին չինական, թուրքական կամ այլ ծագումնաբանական ապրանքներին: «Այս գործընթացը հեշտացավ, որովհետև սա ավելորդ կաշառք տալ էր, քաշքշուկ էր, ավելորդ թանկացում էր, որի պատճառով ներկրողը ավելի շատ հարկեր էր մուծում, և ստացվում էր, որ ապրանքը մրցունակ չէր լինում շուկայում»,- ասաց նա:
Որպես երրորդ գործոն`տնտեսագետն ասաց, որ կարող է գների նվազում տեղի ունենալ, ինչն արդեն նկատելի է: Նա նշեց, որ խոսքը չի վերաբերում միայն սննդամթերքին, բանանի գնի նվազմանը, այլ նաև հումքին, որի նվազումը պահածոյագործների համար հնարավորություն կստեղծի ավելի մրցունակ արտադրանքի համար:
«Այսինքն՝ վերջնական արտադրանքների գների նվազում կարող է տեղի ունենալ, ոչ թե բանջարեղենի, մրգերի առումով, այլ հումքերի, նյութերի էժանացում: Դա մրցակցության արդյունք է, նախկինում մոնոպոլիաները գիտեին, որ ինչ գին էլ դնեին, կվաճառեին, հիմա մոնոպոլիաները վերանում են, մրցունակությունը բարձրանում է, այլ ներկրողներ կհայտնվեն, շատ ներմուծողներ գները կնվազեցնեն»,- ասաց նա:
Չորրորդ հնարավորությունը Գագիկ Մակարյանն այն համարեց, որ Հայաստանում կարող են ստեղծվել նոր արտադրություններ, որոնք նախկինում ձեռնտու չեն եղել հումքի կամ ներկրման դժվարությունների առումով, որոնք էլ կհանգեցնեն նոր աշխատատեղերի ստեղծման, նոր եկամուտների, որոնք էլ ավելի կլավացնեն մրցակցությունը, և մրցունակության բարձրացման արդյունքում որակը կհաղթի, իսկ մինչև այժմ որակն ու գինը իրար հետ կապ չունեցող բաներ էին:
Հինգերորդ կետով Մակարյանը նշեց, որ կշահի արտահանումը: «Հայաստանի արտահանման հնարավորությունները կբարելավվեն, որովհետև երբ ապրանքները դառնում են ավելի որակով, մրցունակ, ավելի հարմար գներով կարող են նոր շուկաներ վաստակել ԵԱՏՄ-ում, ԱՄՆ-ում, կամ ԵՄ-ում»,- ասաց նա:
Տնտեսագետն առայժմ վտանգներ չի տեսնում տնտեսության համար և կանխատեսում է, որ ամռան ամիսներից հետո արդյունքները ավելի տեսանելի կլինեն:
«Կտեսնենք նոր ստեղծվող ձեռնարկություններ, կտեսնենք ներկրողների թվի ավելացում, մրցակցության բարելավում, կտեսնենք գների նվազում, ավելի համերաշխության մթնոլորտ կձևավորվի, քանի որ փոքր ու միջին բիզնեսը գտնվում էր անուշադրության ներքո»,-ամփոփեց նա և վստահություն հայտնեց, որ փոքր ու միջին բիզնեսն արդեն կմասնակցի նաև պետական գնումների գործընթացին, ինչը ևս պետք է բարելավել: