Ամերիկյան պատվիրակությունը ժամանել է ԿԺԴՀ՝ ԱՄՆ-Հս. Կորեա հանդիպման պատրաստության համար
Ամերիկյան պատվիրակությունը ժամանել է ԿԺԴՀ՝ ԱՄՆ-ի և Հյուսիսային Կորեայի առաջնորդների հանդիպման պատրաստության շուրջ բանակցություններին մասնակցելու համար, հաղորդում է Washington Post-ը:
Հաղորդվում է, որ պատվիրակության ղեկավար է նշանակվել ԱՄՆ պետքարտուղարության ԿԺԴՀ հարցերով նախկին հատուկ ներկայացուցիչ Սոն Կիմը, թիմի մյուս անդամներն են Ազգային անվտանգության խորհրդի Հարավային Կորեայի և ԿԺԴՀ-ի հարցերով անդամ Էլիսոն Հուքերը, ինչպես նաև Պենտագոնի ղեկավարի օգնական Ռենդալ Շրայվերը, որն ուղեկցել էր պետքարտուղար Մայք Պոմպեոյին Փհենյան ապրիլյան այցի ժամանակ:
Սպասվում է, որ Սոն Կիմը կհանդիպի ԿԺԴՀ փոխարտգործնախարար Չխվել Սոն Հիի հետ մայիսի 28-29-ին:
Ամերիկյան պատվիրակությունը ժամանել է Փհանմունջոմ ավան, որտեղ օրերս Հյուսիսային և Հարավային Կորեաների նախագահները բանակցություններ են անցկացրել:
Հիշեցնենք, որ հյուսիսկորեացի առաջնորդ Կիմ Չեն Ընը և Հարավային Կորեայի նախագահ Մուն Չժե Ինը մայիսի 26-ին չնախատեսված երկկողմ հանդիպում են անցկացրել: ԿԺԴՀ առաջնորդը շնորհակալություն է հայտնել Մուն Չժե Ինին հունիսի 12-ին նախատեսվող ԿԺԴՀ և ԱՄՆ առաջնորդների գագաթնաժողովի կայացման համար գործադրած ջանքերի համար:
Ավելի վաղ հաղորդվել է, որ Միացյալ Նահանգների նախագահ Դոնալդ Թրամփը չեղարկել է հունիսի 12-ին Սինգապուրում Հյուսիսային Կորեայի առաջնորդ Կիմ Չեն Ընի հետ կայանալիք պատմական հանդիպումը: Այնուհետև Հյուսիսային Կորեան հայտարարել է, որ պատրաստ է ցանկացած պահի, ցանկացած ձևաչափով Միացյալ Նահանգների հետ բանակցություններ անցկացնել։
«Մենք ԱՄՆ-ի հետ բանակցային սեղանի շուրջ նստելու ու ցանկացած ժամանակ ցանկացած ձևաչափով հարցերը լուծելու պատրաստակամություն ենք հայտնում»,- ասել էր Հյուսիսային Կորեայի արտաքին քաղաքական գերատեսչության ղեկավարի տեղակալ Կիմ Կե Հվանը: