Өзбекстандын жараны чек арада чоочун паспорт менен кармалды

Өзбекстандын 47 жаштагы жараны 26-майда Баткен облусундагы кыргыз-өзбек чек арасындагы "Шаймерден" чек ара бекетинен Кыргызстанга башка бирөөнүн паспорту менен кирүүгө аракет кылган. Чек арачылар паспорттогу сүрөт жана башка маалыматтардын жарандын көрүнүшүнө туура келбестигин шектенишкен. Сурак учурунда өзбекстандык жаран паспорт өзүнүкү эмес экенин мойнуна алган.


Тиешелүү документ иштери бүткөндөн кийин өзбек жараны жергиликтүү милиция кызматкерлеринин колуна өткөрүлүп берилген.


6-май күнү Баткен облусунун аймагында жайгашкан "Ак-Кыя" бекетинен унаанын жүк салгычына жашырынып, Кыргызстанга өтүүгө аракет кылган өзбекстандык жаран кармалган. 


Айдоочу жана коңшу өлкөнүн тургуну Кыргызстандын Улуттук коопсуздук боюнча мамлекеттик комитетине өткөрүлүп берилди.


Өзбекстандын мурдагы президенти Ислам Каримовдун тушунда бир канча жыл жабык турган кыргыз-өзбек чек арасы 2017-жылдын күзүндө ачылып, ары-бери каттоо жанданган. (ZKo)