Եվրոպական չափանիշների հանգստի գոտի է լինելու. Տարոն Մարգարյանը՝ 22 մլն դոլարի ներդրման ծրագրի մասին
Այսօր կառավարության հերթական նիստին Երևանի քաղաքապետ Տարոն Մարգարյանը ներկայացրեց ներդրումային ծրագրին հավանություն տալու և «Պարկ գրուպ» սահմանափակ պատասխանատվությամբ ընկերությանն առանց մրցույթի հողամաս տրամադրելու մասին որոշման նախագիծը: Նշենք, որ ըստ նախագծի՝ 27,66 հեկտար պետական սեփականություն հանդիսացող հողամասը «Պարկ գրուպին» է տրամադրվում առանց մրցույթի, վարձակալության իրավունքով, 99 տարի ժամկետով:
«Պարկ գրուպ» սահմանափակ պատասխանատվությամբ ընկերությունը մտադիր է մանկական, երիտասարդական, ընտանեկան հանգստի և ժամանցի կենտրոն ստեղծելու ծրագիր իրականացնել:
Նախատեսվում է շուրջ 22 մլն ԱՄՆ դոլարին համարժեք դրամի ներդրում կատարել և 60 ամսվա ընթացքում կառուցել տարածաշրջանում նմանը չունեցող, եվրոպական բոլոր ստանդարտներին համապատասխանող հանգստի և ժամանցի կենտրոն: Կլինեն նաև գերժամանակակից ատրակցիոններ, որոնք տեսակով եզակի կլինեն:
Կառավարության նիստից հետո լրագրողների հետ զրույցում Տարոն Մարգարյանը նշեց, որ հիմնական շինություններ այդտեղ չեն կառուցվելու:
«Շինությունը կառուցվելու է այնպիսի տարածքում, որտեղ թույլատրվելու է և հիմնականում կոնստրուկցիոն տարբերակով և լինելու է տարածաշրջանում առաջինը նման հանգստի և զվարճանքի գոտի: Համոզված եմ, որ այդտեղ կստեղծվի մի շատ գեղեցիկ միջավայր»,-ասաց նա։
Քաղաքապետը նշեց, որ նախկինում կային վարձակալներ, և ներդրողը նաև պարտավորություն է վերցրել այդ վարձակալների հետ բանակցել և փոխհատուցում տրամադրել և այդ ամենի ավարտից հետո քաղաքապետարանը նոր պայմանագիրը կնքի, և քաղաքաշինական այդ ծրագիրը կիրականացնեն:
Նա նշեց, որ երեք ամսում փաստաթղթային գործընթացը կավարտեն և հինգ տարվա ընթացքում 22 միլիոն ԱՄՆ դոլարի ներդրումից հետո բացման արարողությունը տեղի կունենա:
«Այնտեղ ջրային միջավայր, շատրվաններ են լինելու, և երբ էսքիզային տարբերակը նայում ենք, ապա եվրոպական չափանիշների լավագույն հանգստի գոտին է լինելու»,-ասաց նա: