Սաակաշվիլին անցնում է «300 սպարտացիների» որոնմանը՝ Ուկրաինան կառավարելու համար
Վրաստանի նախկին նախագահ, Ուկրաինայի Օդեսա նահանգի նախկին նահանգապետ Միխեիլ Սաակաշվիլին հայտարարել է, որ պատրաստվում է նոր կադրեր փնտրել Ուկրաինան կառավարելու համար, հայտնում է RT հեռուստաալիքը:
Այդ մասին քաղաքական գործիչն ասել է Ուկրաինայի անվտանգության ծառայությունում հարցաքննությունից հետո տված ճեպազրույցի ժամանակ։
Սաակաշվիլին նշել է, որ դրա համար նա վաղվանից կսկսի ճանապարհորդել ամբողջ երկրով և փնտրել, իր իսկ խոսքով, «այդ 300 սպարտացիներին»:
«Ես վաղվանից սկսում եմ երկրով մեկ ճանապարհորդելը, մենք սկսում ենք մարդկանց հավաքագրումը նոր իշխանության համար: Ես պատրաստվում եմ գտնել այդ 300 սպարտացիներին, մենք պետք է գտնենք նոր մարդկանց, որոնք կղեկավարեն երկիրն այլ մեթոդներով, որոնք ոչ թե կգողանան մեր փողերն ու կավերեն Ուկրաինան, այլ կկառուցեն այն», - ասել է Սաակաշվիլին:
Օրեր առաջ քաղաքական գործիչը հայտարարել է Կիևի կենտրոնում բողոքի ցույցերի վերականգնման մասին:
Հիշեցնենք, որ Սաակաշվիլիի կողմնակիցների բողոքի ցույցերը վերջինիս հրահանգով դադարեցվել էին ամանորյա տոների ընթացքում: