Մենք մյուս շաբաթ ձեռք ենք բերելու 50 հազար դեղաչափ չինական պատվաստանյութ, որը հասանելի է լինելու 18-ից բարձր բոլոր քաղաքացիների համար․ Առողջապահության նախարար (տեսանյութ)
Մենք սեփական օրինակով ուզում էինք ցույց տալ, որ պատվաստումները կարևոր կանխարգելիչ միջոցառումներ են, որոնք պետք է օգնեն մեզ հաղթահարել կորոնավիրուսը և վերադառնալ բնականոն կյանքի: Այս մասին ասուլիսի ընթացքում ասաց առողջապահության նախարար Անահիտ Ավանեսյանը, որը պատվաստվել է կորոնավիրուսի դեմ: Նախարարը նշեց՝ փոխվարչապետի պաշտոնակատար Տիգրան Ավինյանը ևս պատրաստվել է «AstraZeneka» պատվաստանյութով:
«Պատվաստումների գործընթացը այս տարվա կարևորագույն գործընթացներից մեկն է և պատվաստման տեմպերը էականորեն ազդելու են տարբեր երկրներում ներքին կարգավորումների, տուրիզմի և առհասարակ տնտեսական իրավիճակի վրա և միանշանակ քաղաքականությունը պետք է լինի հնարավորինս շատ մարդկանց համոզել և խրախուսել, որպեսզի կորոնավիրուսի դեմ պատվաստման գործընթացին մասնակցեն»,- նշեց Տիգրան Ավինյանը:
Տիգրան Ավինյանն ընդգծեց, որ հատուկ են ընտրել «AstraZeneka»-ն, քանի որ տվյալ պատվաստանյութի մասին շատ է ապատեղեկատվությունը:
«Որքանով ինձ է հայտնի մոտավոր 200 միլիոն դեպքից ընդամենը վատթար դեպքեր եղել են ընդամենը մի քանի տասնյակ»,- ասաց Ավինյանը:
Անահիտ Ավանեսյանը ասուլիսի ընթացքում նշեց՝ ծրագրի նպատակներից մեկն է ունենալ հնարավորինս մեծ թվով պատվաստված անձինք:
«Մոտ մի քանի օր առաջ ունեցել ենք շատ ծանր կարգավիճակով հիվանդ հղի կանայք և եթե օրինակ նրանց շրջապատի անձինք պատվաստված լինեին, ապա չէին կանգնի այդ խնդիր առաջ: Մենք նպատակ ենք դրել պատվաստման միջոցով հանրային իմունիտետ ձևավորել և հնարավորինս շատ քաղաքացիներ ունենալ, որոնք պատվաստվել են»,- նշեց Ավանեսյանը
Անահիտ Ավանեսյանը նշեց, որ շուտով Հայաստանում ունենալու ենք պատվաստանյութերի նոր խմբաքանակ և 18-ից բարձր անձինք կունենան պատվաստվելու հնարավորություն:
«Մենք մյուս շաբաթ ձեռք ենք բերելու 50 հազար դեղաչափ չինական պատվաստանյութ, որը հասանելի է լինելու 18-ից բարձր բոլոր քաղաքացիների համար, քաղաքացիները կարող են հերթագրվել և պատվաստվել»,- նշեց Անահիտ Ավանեսյանը:
Տիգրան Ավինյանը նաև տեղեկացրեց՝ «Sputnik V» պատվաստանյութի հետ կապված պայմանավորվածությունները ուժի մեջ են:
«Որոշակի գործընթացներ տեղի են ունենում և ուզում եմ շեշտել՝ բոլոր հնարավոր ուղղություններով այն պատվաստանյութերը, որոնք մեզ մոտ արդեն իսկ հաստատված են, մենք բոլոր հնարավոր պատուհանները օգտագործելու ենք և տնտեսական միջոցները հատկացնելու ենք, որպեսզի ապահովենք լուրջ խմբաքանակ այս տարվա պատվաստումների համար»,- ասաց Ավինյանը: