Որևէ բովանդակային քննարկում չկա, բացի անձնական վիրավորանքներից, բայց եթե որևէ քննարկում կա, ապա այն մասին է, որ փող չկա. Էդմոն Մարուքյան (տեսանյութ)
Մենք կարծում ենք, որ մայիս-հունիս ամիսների համար պետք է 100 մլրդ դրամ ծախսել, այսինքն՝ մայիս ամսին պետք է 100 մլրդ դրամ ներարկել տնտեսության մեջ, որպեսզի ՀՀ քաղաքացիներին ֆինանսական աջակցություն ցուցաբերվի: Երկրում սկսված այս բանավեճի առիթն ամբողջությամբ մեր առաջարկն է: Այս մասին իր ֆեյբուքյան էջում հրապարակած տեսանյութում ասաց ԱԺ «Լուսավոր Հայաստան» խմբակցության ղեկավար Էդմոն Մարուքյանը:
Նա հիշեցրեց, որ շատ ընտանիքների կարգավիճակների, միջազգային փորձի, Կառավարության տասնչորս հակաճգնաժամային ծրագրերը և դրանից բխող խնդիրներն ուսումնասրիելու արդյունքում՝ նոր ծրագիր են առաջարկել, որի շրջանակում 100 հազար դրամ պետք է տրամադրվեր 500 հազար ընտանիքներին, և պետք է մեկ ամսվա հավելյալ թոշակ տրամադրվեր 470 հազար թոշակառուներին:
Նա նշեց, որ երկրում ստեղծված բանավեճն ամբողջությամբ նրանց այս առաջարկի պատճառով է: «Այսինքն, որևէ բովանդակային քննարկում չկա, բացի անձնական վիրավորանքներից, բայց եթե որևէ քննարկում կա, ապա այն մասին է, որ փող չկա: Մենք այս օրերի ընթացքում ապացուցել ենք, որ փողը կա, ամեն օր ապացուցել ենք, որ վարչապետն ասում է՝ մարդիկ շատ ՀԴՄ ենք տպում, և բոլորս դրա համար գլուխ էինք գովում: Ցույց էր տալիս, թե որքան հավելյալ գումար է հավաքագրվել»,- ասաց նա:
Մարուքյանը հավելեց, որ այդ հավաքագրված գումարը չի նախատեսվել, որպես պետական եկամուտ և եղած ծախսերը չեն ծախսվել անցած երկու տարիներին: Ըստ նրա՝ Հայաստանը մտել է լուրջ ճգնաժամի մեջ՝ նման մեծ գումարային մնացորդ ունենալով, որը մոտավոր կազմում է 380 մլրդ դրամ և նրա խոսքով՝ այդ գումարից հանգիստ կարող էր 100 մլրդ դրամը տրամադրվել ընտանիքներին աջակցելուն:
«Զուտ մարդկանց տեղեկացնելու համար, թե մենք փող ունենք, այդ փողով ենք մտել ճգնաժամի մեջ և կարող ենք մարդկանց աջակցել՝ անդադար դարձել ենք տարատեսակ ելույթների, մեզ ուղղված զրպարտանքների թիրախը: Սակայն, սա որևէ կերպ չի փոխելու մեր ընթացքը»,- նշեց պատգամավորը:
Մանրամասները՝ տեսանյութում