Բուֆերային գոտիների ստեղծում, միջուկային փորձարկումների սառեցում. ինչ են պայմանավորվել Հս. և Հրվ. Կորեաների առաջնորդները Փհենյանում
Հյուսիսային Կորեայի ղեկավար Կիմ Չեն Ընն ու նրա հարավկորեացի գործընկեր Մուն Չժե Ինը Փհենյանում կայացած բանակցությունների շրջանակում եկել են մի շարք կարևոր համաձայնությունների:
Մասնավորապես՝ Կիմ Չեն Ընը համաձայնել է միջազգային դիտորդներին թույլ տալ հետևել՝ ինչպես են ընթանում հրթիռային կայանների ապամոնտաժման աշխատանքները: Բացի այդ, նա համաձայնել է սառեցնել միջուկային և հրթիռային փորձարկումների ծրագիրը, ինչպես նաև պարտավորվել է Հարավային Կորեայի հետ հարաբերությունների հետագա բարելավմանն ուղղված քայլեր ձեռնարկել:
Ինչպես նշում է Daily Mail-ը, Հարավի և Հյուսիսի ղեկավարները համակարծիք են այն հարցի շուրջ, որ Կորեական թերակղզին պետք է լինի ապամիջուկայնացված, խաղաղ երկիր՝ առանց միջուկային սպառնալիքների:
Բացի այդ, կողմերը պայմանավորվել են բուֆերային գոտիներ ստեղծել ցամաքային և ջրային սահմաններին՝ այդպիսով նվազեցնելով ռազմական լարվածությունը:
Աղբյուրը հավելում է, որ Սեուլն ու Փհենյանը պատրաստվում են նաև մինչ դեկտեմբեր ապառազմականացված գոտուց հեռացնել 11 պահակակետերը, ստեղծել համատեղ զինվորական հանձնաժողով, որի նպատակը կլինի Կորեական թերակղզում ռազմական գործողությունների կանխումը:
Հատկանշական է, որ Կիմ Չեն Ընն ու Մուն Չժե Ինը պայմանավորվել են համատեղ դիմում ներկայացնել՝ 2032թ. կայանալիք Օլիմպիական խաղերը հյուրընկալելու իրավունքը ստանալու համար: