«S.O.S Սևան»-ն ԱԺ-ի դիմաց բողոքի ակցիա է իրականացնում. պահանջում են խնայել Սևանի ջուրը (լուսանկարներ, տեսանյութ)
Այս պահին Ազգային ժողովի դիմաց բողոքի ակցիա են իրականացնում «S.O.S Սևան» նախաձեռնության անդամները: Նրանք կոչ են անում խնայել Սևանա լիճը, կանխարգելել Սևանից հավելյալ ջրի բացթողումը:
Նախաձեռնության անդամները Tert.am-ի հետ զրույցում վստահեցրին, որ իրենց համար կապ չունի, թե որ կառավարությունն է, նրանք շարունակելու են պայքարել Սևանի պահպանության համար:
Բնապահպան Սիլվա Ադամյանը Tert.am-ի հետ զրույցում ասաց, որ ինքը ոգևորվել էր վարչապետ Նիկոլ Փաշինյանի հայտարարությունից, թե «Սևանը լողավազան չէ, որ ջուր վերցնես», բայց կառավարությունը ներկայացվել է դիրքորոշում, թե այլ ճանապարհ չկա, քան Սևանից ջուր վերցնելը:
«Ո՛չ բնապահպանները, ո՛չ գիտնականները, ո՛չ կառավարությունը չեն կանխատեսել, որ կլիմայական այսպիսի փոփոխություններ կլինեն: Հույս ունենք, որ Սևանը կշարունակի յոլա տանել, բայց Սևանի հետ կատարվածը՝ մամռակալումը, գույնի փոփոխությունը, վկայում են, որ Սևանը վտանգված է»,- նշեց նա:
Ըստ ակցիայի մասնակիցների՝ իրենք չեն գնում ծայրահեղ քայլերի, չեն փակում օրինակ՝ փողոցը, խնդրել են հանդիպում կառավարության ներկայացուցիչների հետ՝ ներկայացնելու Սևանի իրական վիճակը:
Բնապահպան Ինգա Զառաֆյանն էլ Tert.am-ի հետ զրույցում ասաց, որ ջուրը հասնում է տեղի պաշտոնյաներին, մասնավորապես նախկին վարչապետ Հովիկ Աբրահամյանին:
«Այն, որ Սևանի թափանցիկությունը վերացավ, այն, որ Սևանը մամռակալեց, վկայում է այն մասին, որ Սևանը վտանգված է: Անցյալ տարի ջրի մակարդակը բարձրացավ, տեխնիկա գնեցին, որ մաքրեն ջրի հատակը, հետո պարզվեց, որ Սևանում չի աշխատում այդ տեխնիկան: Վտանգված է Սևանի բուսական ու կենդանական աշխարհը»,- ասաց Զառաֆյանը:
«S.O.S Սևան» նախաձեռնությունը նաև բաց նամակով դիմել է ՀՀ վարչապետ Նիկոլ Փաշինյանին` խնդրելով հետ կանչել ՀՀ կառավարության կողմից ՀՀ ԱԺ-ի հաստատմանը ներկայացված Սևանա լճից հավելյալ 40 մլն խմ ջրառի մասին օրինագիծը: