ՍԴ նախկին անդամ Վալերի Պողոսյանը պնդում է՝ ցուցմունք չի տվել Արմեն Գևորգյանի կողմից ճնշման վերաբերյալ
Սահմանադրական դատարանի նախկին անդամ Վալերի Պողոսյանը պնդում է՝ ցուցմունք չի տվել, որ նախկին փոխվարչապետ Արմեն Գևորգյանը ճնշում է գործադրել իր կամ իր եղբոր նկատմամբ՝ 2008 թվականին նախագահական ընտրությունների վերաբերյալ բարձրագույն դատարանում Սերժ Սարգսյանին ձեռնտու որոշում կայացնելու համար։
«Ազատություն» ռադիոկայանի հետ զրույցում Վալերի Պողոսյանը հայտարարել է, որ ինքը որոշ փաստեր է ներկայացրել:
Անդրադառնալով ՀՔԾ պետ Սասուն Խաչատրյանի հայտարարությանը, թե ՀՀ երկրորդ նախագահ Ռոբերտ Քոչարյանի աշխատակազմի ղեկավար Արմեն Գևորգյանը ճնշում է գործադրել Սահմանադրական դատարանի դատավորի վրա, որպեսզի կայացվի Սերժ Սարգսյանի օգտին որոշում՝ նա ասել է. «Ես այդպիսի բան չեմ ասել, ես իրենց ասել եմ որոշ փաստեր, որոնք իրենք ներկայացնում են որպես ճնշում, դա իրենց գործն է:
Չեմ ասում՝ եղել է կամ չի եղել, ես ներկայացրել եմ փաստը, դա մեկնաբանություն է, մնացածը ուրիշ է՝ ես կարող եմ մեկնաբանել այսպես կամ այնպես»:
Հիշեցնենք, որ Հատուկ քննչական ծառայությունը մեղադրանք է առաջադրել Արմեն Գևորգյանին՝ արդարադատության իրականացմանը խոչընդոտելու համար։
Ծառայության ղեկավար Սասուն Խաչատրյանը հայտարարել է, որ մեղադրանքի առիթը ՍԴ անդամի վրա ճնշումն է։
Արմեն Գևորգյանը 2008-ին զբաղեցնում էր երկրորդ նախագահ Ռոբերտ Քոչարյանի աշխատակազմի ղեկավարի պաշտոնը, այդ տարիներին նախագահականում էր աշխատում նաև Վալերի Պողոսյանի եղբայրը։
Սասուն Խաչատրյանը հայտարարել էր, որ Գևորգյանը Պողոսյանի վրա հենց վերջինիս եղբոր միջոցով է փորձել ճնշում գործադրել: