Սեֆիլյանի գործով դատին ամբաստանյալների ու պաշտպանների մեծ մասը բացակայում է, դատարանը շարունակում է սանկցիաներ կիրառել
Շենգավիթ վարչական շրջանի ընդհանուր իրավասության դատարանում կազմակերպված խմբի կողմից ապօրինի զենք, ռազմամթերք պահելու մեջ մեղադրվող Ժիրայր Սեֆիլյանի, Գևորգ Սաֆարյանի, Հրայր Թոփչյանի, Սասունիկ Կիրակոսյանի, Հովհաննես Պետրոսյանի, Գալուստ Գրիգորյանի, Ներսես Պողոսյանի քրեական գործով այսօրվա դատական նիստին նոր մեղադրող ներգրավվեց, ինչից հետո դատարանը հարցրեց դատավարության կողմերի կարծիքը նոր մեղադրողին բացարկ հայտնելու վերաբերյալ:
Մեղադրող դատախազ Պետրոս Պետրոսյանը դատարանին գրությամբ տեղեկացրեց, որ մեղադրանքի պաշտպանությանը ներգրավվել է նաև ՀՀ գլխավոր դատախազության, ԱԱԾ մարմիններում քննվող, թմրանյութերի ապօրինի շրջանառության հետ կապված և կիբերհանցագործությունների գործով վարչության պետի տեղակալ Հակոբ Ենոքյանը:
Ներսես Պողոսյանի պաշտպան Արայիկ Պապիկյանն ասաց, որ դատախազի մասին կարծիք կարող է հայտնել միայն իր պաշտպանյալի հետ խորհրդակցելուց հետո, ինչի հնարավորությունը դատարանը չի տալիս:
Նշենք, որ Ներսես Պողոսյանը, դատարանի նկատմամբ անհարգալից վերաբերմունք դրսևորելու համար գործով մյուս ամբաստանյալների հետ, բացառությամբ Սաֆարյանի և Սասունիկ Կիրակոսյանի, 10 ժամով հեռացվել է նիստերի դահլիճից:
Գևորգ Սաֆարյանը հեռացվել է 6 ժամով:
Ներսես Պողոսյանի մյուս պաշտպան Նինա Կարապետյանցին դատարանը դիրքորոշում հայտնելու հնարավորություն չտվեց՝ ասելով, որ նա դեռևս ներգրավված պաշտպան չէ։
«Ձեզ արտահայտվելու հնարավորություն կտրվի գործում ներգրավվելուց հետո»,-ասաց նիստը նախագահող դատավոր Տաթև Գրիգորյանը:
Փաստաբանը նկատեց, որ նիստերի քարտուղարն իրեն ներկայացրել է որպես պաշտպան, այդ դեպքում թող նշվեր որպես փաստաբան. «Բացի այդ, ես ու Արայիկ Պապիկյանը միջնորդություն ենք ներկայացրել՝ ստորագրած երկուսիս կողմից, որը հավանաբար Դուք չեք էլ կարդացել: Ես պետք է արտահայտվեմ»:
«Դո՛ւրս եկեք նիստերի դահլիճից»,-ասաց Գրիգորյանը:
Նիստերի դահլիճը լքելուց հետո լրագրողների հետ զրույցում Նինա Կարապետյանցն ասաց, որ ինքը չի հասկանում, թե ինչպես է առաջնորդվում դատարանը. «Ես կլինեմ նիստերի դահլիճում այն ժամանակ, երբ Ներսես Պողոսյանը բերվի նիստերի դահլիճ: Ես չեմ հասկանում դատարանի տրամաբանությունը, երբ հայտարարում են, թե ովքեր են ներկա նիստերին, քարտուղարն ասում է՝ պաշտպաններ...: Ես արդեն չգիտեմ՝ այս դատարանը կիրառում է սանկցիա, չի կիրառում, ինչ է անում»:
Դատական նիստին դատարանը նաև արձանագրեց, որ պաշտպաններ Տիգրան Եգորյանն ու Տիգրան Հայրապետյանը բացակայում են:
Տիգրան Եգորյանը գրություն էր ուղարկել այն մասին, որ ինքնազգացողությունը վատ է և խնդրել էր դատարանին իր բացակայությունը համարել հարգելի: Բացի այդ, փաստաբանը հայտնել էր, որ իր պաշտպանյալը հեռացված է նիստերի դահլիճից և հետևաբար իր ներկայությունն անարդյունավետ է:
Դատարանն արձանագրեց, որ Տիգրան Եգորյանը չնայած գրություն ուղարկել է, սակայն իր վատառողջ լինելը հավաստող փաստաթուղթ չի ներկայացրել. «Դատարանը կտեղեկացնի Տիգրան Եգորյանին, որպեսզի նա համապատասխան փաստաթուղթ ներկայացնի, ինչից հետո էլ կքննարկի նրա բացակայությունը հարգելի համարելու հարցը»:
Տիգրան Հայրապետյանը որևէ գրություն չէր ուղարկել, ինչից հետո դատարանը գնաց խորհրդակցական սենյակ և նրա նկատմամբ դատական սանկցիա կիրառեց՝ պատասխանատվության ենթարկելու մասին դիմումով դիմելով Փաստաբանների պալատ:
Կես ժամ ընդմիջումից հետո նիստերի քարտուղարի՝ «ոտքի՛, դատարանն է գալիս» հայտարարությունից հետո ամբաստանյալ Սասունիկ Կիրակոսյանը ոտքի չկանգնեց:
Դատարանը հարցրեց, թե ինչու ամբաստանյալը ոտքի չի կանգնում, Կիրակոսյանն ասաց. «Մյուս տղաներից հետ չմնալու համար»:
Նիստը նախագահողի հարցին, թե դատարանը կարո՞ղ է արձանագրել, որ Սասունիկ Կիրակոսյանի ոտքի չկանգնելը պայմանավորված չէ առողջական խնդիրներով, ամբաստանյալն ասաց. «Իհարկե»:
Ամբաստանյալի նկատմամբ նույնպես դատական սանկցիա կիրառվեց՝ նախազգուշացում:
Հաջորդիվ հայտարարությամբ ցանկացավ հանդես գալ Ներսես Պողոսյանի պաշտպաններից Արայիկ Պապիկյանը: Նա դատարանին խնդրեց, որպեսզի իր՝ դատարանի դահլիճից դուրս գալը չդիտվի անհարգալից վերաբերմունք դատարանի նկատմամբ, որովհետև իր պաշտպանյալն առանց իր ներկայության թույլ չի տվել պաշտպանին մասնակցել դատական նիստին:
Դատարանը կարգադրեց մնալ նիստերի դահլիճում, որովհետև պաշտպանն իրավունք չունի ինքնակամ լքելու նիստերի դահլիճը։ «Իրավական հետևանքներին դուք ծանոթ եք, բացի այդ, եթե լքեք նիստերի դահլիճը, ապա դատարանը կարձանագրի, որ երրորդ նիստն անընդմեջ դուք չեք մասնակցում»,-ասաց դատավորը:
«Գիտեմ»,-պատասխանեց Պապիկյանն ու լքեց նիստերի դահլիճը:
Դատարանը գնաց խորհրդակցական սենյակ փաստաբանի վարքը քննելու: Որոշումը կհրապարակվի մեկ ժամից: Փաստաբանն ասաց, որ իր նկատմամբ կիրառվելու է հերթական դատական սանկցիան: