Түбән Кама волонтерлары коры душ һәм маскировка челтәрләре әзерләүгә грант отты
Түбән Каманың «Игелекле йөрәкләр» төркеме волонтерлары грант бәйгесендә җиңү яулады. Алар патриотик чараларга 860 мең сум акча сарыф итәчәк, коры душ һәм маскировка челтәрләре өчен кирәкле материаллар сатып алачак.
Битараф булмаган шәһәр халкы инде ике елдан артык махсус хәрби операциядә катнашучылар һәм аларның туганнарына һәртөрле ярдәм күрсәтә. Хәзер Химиклар урамында урнашкан үзәк – гуманитар ярдәм формалаштырыла торган иң күренекле урыннарның берсе.
Биредән кеше бер дә өзелми. Махсус операция зонасына киткән һәркем диярлек монда үзенә кирәкле әйберләр ала, ди Волчок кушаматлы хәрби.
«Эчке киемнәр, сабын, консервалар... Анда кирәкле әйберләрнең барысын да монда бирделәр», - диде ул.
Махсус хәрби операция барган вакытта биредә 1423 контрактник ярдәм алган. Атна саен диярлек егетләр өчен посылкалар җибәрәләр, һәркайсына балалар язган хатларны салалар.
Грант акчасын «Аҗаган» уенын үткәрүгә, хәрбиләрнең гаиләләренә ярдәм күрсәтүгә сарыф итәргә ниятлиләр.
«Мобилизацияләнүчеләр һәм контрактникларның балалары белән Яңа ел чаралары үткәрәчәкбез. Һәлак булган якташларыбыз истәлегенә дә нәфис сүз бәйгесе оештырачакбыз», - дип планнары белән уртаклашты Территориаль иҗтимагый үзидарә советы рәисе Лариса Орлова.
Акчаның тагын бер өлешен коры душ һәм маскировка челтәрләре өчен тукыма сатып алуга тотачаклар. Биредә ярдәм итәргә теләгән кешеләрне һәрвакыт һәм теләсә кайсы вакытта көтеп калалар.
2 сентябрьдән Татарстанда РФ Саклану министрлыгы белән контракт төзүчеләргә 2 миллион сумга якын акча бирелә. Бу республикада түләүләрнең артуы белән бәйле.
РФ Кораллы көчләре сафларында контракт буенча хезмәт итү, шулай ук премияләр, ташламалар һәм түләүләр турында heroes-tatarstan.ru сайтында яки 117 телефоны буенча белергә була. Шулай ук Контракт буенча хәрби хезмәткә сайлап алу пунктына (1нче разряд) мөрәҗәгать итәргә мөмкин. Адресы: Казан, Аэропорт урамы, 1/40; телефоны: (843) 221-44-52. Моннан тыш, 8 800 222 59 00 номеры буенча мөрәҗәгать итәргә була.
Материал Надежда Баһаветдинова катнашында әзерләнде.